諾基亞睇淡明年業務前景，即係睇淡明年電訊市場，搞到電訊股跌到七個一皮，恒指連1萬點關口都失守，最後跌231點，收報9995，成交達74億元。
電訊股中跌得最重係累積升幅逾50%嘅電盈（008），單日跌6.5%，收報1.43元。電盈大跌，除咗因為持小量股權嘅第一通在星洲跌破底價外，亦有傳言指電盈為增加來自香港電話盈利嘅運用權，不惜借貴錢，此舉有可能被分析員調低其投資評級及盈利預測，現在可能只係剛開始回吐，後市重有得跌。
位元堂（897）噚日急升23.33%，收報3.7仙，據聞市場主要係炒新產品概念。現時潮流興中藥保健，而有關產品嘅邊利潤隨時可以高達8成，利錢相當高，只要有一兩隻產品能成功推出市場及被接受，就真係豬籠入水。位元堂係本港知名中藥店，單係個名都值錢，若與中大合作研發之產品可推出市場，料可大大增加公司收入。不過新產品未有咁快推出，照計唔使咁快炒定先。
講開中藥股，之前炒味頗濃嘅龍發製藥（2898）近日有大戶散貨，市場承接力不足，噚日大挫8.8%，收報0.52元，較高位0.68元已累跌23.53%。黑客話，如果跌勢持續，唔排除有人會被迫拆倉掟貨，跟炒要小心。
粵海系熱炒，噚日逆市炒上，粵投（270）大升7.86%，收0.96元，成交7977萬元；廣南（1203）再升5.46%，收報0.135元，成交3353萬元。市場傳聞粵投會獲得注入電廠，亦有傳言話粵投好快就可以派息。不過，粵海系過往久唔久就會勁炒三四日，至於後勁有幾強，相信大家心中有數。
阿虎