唔知大家重記唔記得係世界盃決賽周有好出色表現嘅土耳其國家隊門神魯斯度呢?最近佢喺費倫巴治就都幾運滯,重後悔自己應該喺球季前離隊投身英超聯,就一早名成利就!
四個月前,魯斯度喺轉會市場確實非常搶手,就連阿仙奴同曼聯都想羅致佢,點知魯斯度就遲遲無決定,結果兩個轉會良機走晒,而佢喺早前歐洲足協盃第二圈次回合輸畀彭拿典奈高斯時表現失準後被傳媒批評,搞到今時今日喺到自怨。
其實,阿仙奴同曼聯今季都曾經有一段時間出現門將危機,我求大俠相信如果佢季初加盟其中一間球會,今日應該做咗球會「一哥」門神。不過,最近有消息傳拉科魯尼亞都想搵個門將代摩連拿,話晒有份角逐歐冠盃,魯斯度唔好再錯失良機嘞?!
曼聯前晚對般尼可謂贏埋門質素,不過曼聯個新仔佩治就好唔生性,合共三次對住龍門失機。幾乎同樣位置,蘇斯查一次就射爆對方龍門,呢啲就係「卡士」嘅分別。我求大俠相信就算領隊費爵爺唔怪佩治,佢自己都會留下陰影,無晒信心,睇嚟呢位小朋友嘅前路都會幾難行。
重記得邊個羅馬里奧嘛,咪以為佢年老力衰,原來佢本季巴西聯賽已經為富明尼斯省入十六粒,成個天王咁,唔怪得球會瘦身佢重可以穩袋七萬美金月薪。聽講佢最近同位二十歲靚女同居,真係豔福不淺。愛情事業兩得意,我諗佢已經唔記得冇份踢國家隊嘅事囉,一個球員成三十七歲重咁好境,夫復何求?
昔日同被譽為「移動長城」嘅中國三大中鋒,今日雖同喺「花旗國」搵食,但可惜命運迥異!姚明噚日對馬刺「雙塔」又有驚人演出,又被中外傳媒大事吹捧,可憐被踢入傷兵名單嘅巴特爾,連後備都冇份做。另一邊在洛城嘅「大郅」場場都幾乎呆坐「冷板櫈」,重要俾人指係國家嘅「叛徒」,真係同人唔同命囉!
講開老鬼,前晚意大利盃AC米蘭對安科納,意國傳媒打鑼打鼓報道列當度復出,果然佢第一次喺正式比賽為AC上陣,諗住第日做晒報章頭條;好衰唔衰AC同時派埋另一老鬼李安納度落場,呢位巴西老兄重幫埋隊波扳平㖭,結果,列當度緊係俾佢搶晒風頭啦。
逢周一至周五見報