最近，響街上見到好多私家車嘅車身有不少花痕，呢類花痕大部份都係由輕微碰撞所引起，而且重可以自行用拋光蠟去除，效果重一啲都唔差㖭！特別係對一啲刮花車身油漆嘅花痕，最為見效，而拋光蠟亦有好多種，但不外乎係輕量拋光同重型拋光兩種。一般嚟講，DIY嘅拋光過程只屬輕量拋光，因重型拋光只適用於剛重新噴油嘅車身上，而拋光過程更必須用上機器打磨，以及配合特別嘅拋光水磨砂紙才可。另外，現時市面上可以買到嘅拋光蠟，價錢約為$15至$25不等，而今次用作示範嘅拋光蠟為日本出品，並屬輕量拋光，過程如下：
1﹒首先將有花痕嘅部份，以汽車專用嘅清潔劑清洗乾淨；但若花痕較深的話，大可到五金舖買些許拋光用嘅水磨砂紙，並輕力將鐵碎擦去。
2﹒響花痕部份塗上拋光蠟，以單一方向不斷轉圈，花痕便會逐漸退去。
3﹒用另一塊清潔嘅抹車布將拋光蠟除去，你會開始發現花痕會逐漸退去，跟住再打上一般嘅水晶蠟便可回復原狀㗎喇！