港區全國人大代表選舉嘅分餅仔遊戲大功告成，不過就搞到好多人氣頂頂；田少話要去告狀，政協委員雲大棉好勞氣，認為今次選舉咁玩法好唔漂亮。
雲老認自己為三個候選人拉票，包括梁劉柔芬、梁秉中同埋林順潮，結果只有梁太勝出，梁秉中再次梗頸排三十七落選；至於林醫生，更加由第五勁跌到第四十一位，佢話全世界都未見過咁嘅選法，一定有人搞鬼造馬。
咁又係嘅，林醫生唔知幫幾多國家及本地政要做過眼手術，八方記得嘅猛人包括有利國偉、范太同曾鈺成等等，大家都畀面。至於雲老，佢話已盡全力，拉票拉到手都損晒，連對喺太子行高和（即係李國寶訂鞋嗰間）訂做、四千銀嘅鱷魚皮皮鞋都行爛埋，算對得住朋友。
傳真︰2623-9278
電郵︰