特首噚日晨咁早搭火車上廣州見省長盧瑞華，但等到黃昏先同新嘅廣東省委書記張德江見面，成個下午無所事事，港澳辦安排佢四圍槓，大隊就好似參加三十八蚊廣州半天鴨仔團咁。
老董同盧省長食飽晏之後，俾人車咗去重未起好嘅廣州國際會展睇施工，行唔夠半個鐘又開車，去一個優農產品博覽會，睇橙睇蕉睇瓜睇菜，再去廣州東站隔籬嘅公園睇人工瀑布，唔夠五分鐘，影張相就要走。
咁樣走來走去，八方都替佢老人家辛苦；不過最慘嘅重係廣州市民，公安喺老董每到一站之前就清場，大叫一句：「領導來了！」大家就要即刻退避三舍。
同老董一齊出差嘅特首辦主任林煥光就記得七四年第一次去廣州旅行，當時住紅雲旅館只係一蚊一晚，比起𠵱家當然落後好多，要燒柴煲一大鑊熱水先有得沖涼，條街又冇車，瞓喺馬路都唔驚車死！
（圖）老董噚日俾人喺廣州帶住遊花園，重去埋優農產品博覽會睇蔬果，認真好玩。
傳真︰2623-9278
電郵︰