早前已經講過，高人指點迷津，話舊曆11月係唔好嘅月份，會再出現大跌市。噚日11月初一，又係第1日，恒指就大跌，落番10000大關之下，真係唔到你唔信。
其實，大市今次反彈，到10200已經舉足維艱，加上外圍轉弱，港股跌勢遂再起。高人話，呢個月嘅跌市，可以話係全球性，主要係美國跌先，再拖累其他地區。有天災，亦有人禍。前者係太平洋區會發生大地震，對經濟會造成嚴重打擊；後者係美國會再爆發企業醜聞，重大劑過上一次。家吓先開始，重有1個月咁長，唔揸貨最穩陣，消息股短炒則無妨，到03年睇定形勢再大舉出擊。
不過，講心裏面嗰句，可能會造成生靈塗炭嘅大災難，人人都唔希望佢發生。跌市還跌市，天災預言，真係唔靈好過靈。
事實上，今次反彈市，由8700多點起步升得上10200水平，自然又可以落番去9000呢啲位。總之，呢個月之內，凡有反彈，都係減磅嘅機會，除非有大成交升破呢一輪10247嘅高位，形勢先要重新估計。
恒指噚日低開成百點後反覆向下，收市9995，跌231點，成交74億元，比前日只增4億元，沽壓唔算特別大。恒指已跌穿10日線（10075），出現第一個出貨訊號，第2個支持位係20日線（9932）。大跌後若外圍喘穩，港股或有機會反彈。
文化傳信（343）跟市回落，大市轉勢，睇定先上車。最開心係睇好嗰隻中海油田服務（2883），竟然在大跌市中仍有預期般的好表現，一度搶高至1.99元，收1.96元，仍有4仙進帳，短線2字頭嘅目標，噚日差一個位就見到，總算有交代，至於中長線則仍然揸得過。
早輪推介過嘅中國製藥（1093），呢兩三日股價好似支火箭咁升咗上去，噚日最高見1.46元，收1.42元，逆市升5仙，成交有2205萬股，重見有大盤收集。至於隻艾克國際（8179），話明趁低吸，果然如願以償，噚日最低竟然落到0.19元，但高收0.225元，上升1仙，已有轉勢之兆。
郭兆誠