美股惹禍，港股萬點失守，散231點，咁跌法，啲恒指Put輪自然意氣風發。
升幅龍虎榜上，排頭位嘅係恒指Put輪9448，收7.4仙，升幅48%，升幅係恒指跌幅（2.25%）嘅21倍，有1214萬元成交。排第5位嘅係恒指Put輪9444，收12.3仙，升幅32%，升幅係恒指跌幅嘅14倍，成交金額重勁，有3400萬元，係各輪之首。睇番啲數據，9448下月29日夠鐘，溢價5.8%，槓桿率54倍；9444下月底夠期，溢價3.6%，槓桿率27倍。如果認為未來的幾月，恒指會有400點以上嘅跌幅，呢啲Put輪當然重可以一博，不過大市大跌嘅機會唔大，高追呢兩隻Put輪，風險唔細，咪話恒指彈番，呢對大升Put輪會散落去，就算恒指唔郁，佢哋都會下跌，原因係「收」水（溢價收縮）。
如果覺得個市短期內都重會跌多一陣，硬係要打恒指Put輪主意，最好揀啲壽命較長嘅對象，例如9556。不過個市唔係睇得咁淡，免得過咪買住。
跌幅榜上，好多係下月之前到期嘅末日Call輪，如港交所9104、中移動9376、長實9409同9413、和黃9407、電盈9386等。大部份溢價十幾個巴仙，大概冇乜意外全部會係咁先。總之，有番咁上下溢價嘅末日輪，避之則吉。
章盛