總投資超過六十億嘅上海世茂濱江花園，搵藝人梁朝偉拍廣告，早排電視不斷播出，相信好多人對呢個盤都有啲印象。遲吓個盤重更加哄動，發展商預留嘅頂層複式單位，會喺今個月底公開拍賣，單位有成萬一呎，夠誇張啩！重可俯瞰浦東同外灘全景，聽講底價係三千五百萬。發展商重會請傳媒去上海實地睇吓個盤有幾豪。
萬一呎嘅複式單位有幾大，唔係咁易有具體印象，攞香港最大分層複式單位譽皇居頂層畀大家睇吓，個廳就係咁大，或者可以有啲概念，不過個單位都係得8550呎！比世茂濱江嘅複式細咗兩成幾。當然，論價值就點都唔夠譽皇居高啦。
世茂集團主席許榮茂喺02年福布斯雜誌中國富豪排行，由舊年排名第五升到今年第二名，總資產7.8億美元。
半官方機構貿易發展局，近排頻頻出貨，前幾日先以480萬賣咗東半山嘉園C座八樓單位，噚日屋之島歐志康報料，貿發局再賣埋西半山嘉賢大廈中層A室，作價530萬，兩間都係喺80年代以百零萬買返嚟嘅豪宅，𠵱家唔使講梗係賺到笑啦，兩間屋帳面夾埋賺咗750萬。𠵱家佢哋喺薄扶林同黃泥涌道都重有貨，部份重放緊盤㖭，聽班代理講，貿發局套現到咁上下，就會入市掃貨，諗住換番啲樓齡較新嘅物業，更加保值。
上市公司銀建國際以公司名義，喺上個月買咗中半山寶雲道6A號9樓複式，成交價1760萬，公司嘅主要業務係中港物業投資、基建、工業及百貨業。
公司持有較值錢嘅物業包括金鐘海富中心幾個舖位、跑馬地比華利山同雲暉大廈若干單位等。
主席石春貴唔係咁出名，相反其中一位董事張松橋，係渝港國際主席。
永泰亞洲嘅九龍塘陶源（圖三），美聯物業日前賣廣告話有4個單位做獨家代理，重登咗每個單位嘅門牌、呎數同售價等資料，又出埋發展商嘅logo，睇落好似係發展商委託佢哋咁，實情係一名投資者早前購入，再搵美聯放盤至真。
唔知係咪個廣告易惹人誤會，美記驚破壞同發展商嘅關係，所以噚日又登另一個廣告，話係獨立投資者委託，非發展商委託。
各大發展商搞嘅會籍制度，都會畀啲着數會員，通常係購物折扣優惠，間唔中新盤開售時亦有得平啲。信和𠵱家將粉嶺御庭軒貨尾，以優惠價賣畀「信和之友」會員，先攞八個出嚟，試吓反應。
單位分布喺六同八座，各佔一半，都係三十五樓以上，面積607同657呎，優惠價155.7萬到179.4萬元，每呎2565至2783蚊，比原價約平1%。發展商重提供首十八個月免息供第二按揭、送律師費同釐印費。
睇嚟第日買一手樓，要先入佢哋嘅會，隨時有機會平啲。若果啲千萬豪宅都可以平1%，計落可以慳番十幾萬。
蘭西
電郵地址：