好耐冇見店長S，佢話最近水貨生意唔係冇得做，薄利多銷，其實仍有可為。店長S：「早幾年班利時水貨大帝一件Tee賣二千幾，每件賺足二千蚊，養成佢哋食慣歎慣，去入貨都坐商務。今年只不過回復正常，佢哋即刻唱淡，話人哋賣假貨，呢行其實都好黑暗㗎。」
店長S講起另一單料：「最近我有幾個𡃁仔熟客都猛咁沽貨，將屋企珍藏啲猿猴Tee、關刀鞋、空心搪膠變賣，屬於不計成本，急於套現嗰隻，問佢做乜咁等錢使？原來佢哋被信用卡中心斬倉。即係突然要你喺指定日期前還清卡數，否則搵收數公司代勞，班細路重唔積極撲水咩？」吓，乜信用卡唔係可以只還每月最低付款額，當畀高息就可以拖長還咩？
店長S：「聽講𠵱家好多二三線銀行，發現卡主拖超過一萬蚊數半年，就算你每月依時找最低付款額，都要突然斬倉，可能銀行心照知道信用卡利息過高，基層根本還唔起，所以早斬早着。銀行尤其鍾意向大學生迫倉，知道佢哋重有老竇老母照住，唔會走數。不過我啲客都算好仔，自己的事自己負責，寧願將對花四千幾蚊買番嚟嘅『拾篇燈撈暴』蝕賣一半套現找數，費事到時收數公司搞到上屋企。」聽完心頭不禁一酸。
主持人：大食Jack
八卦熱報：