奧迪Allroad自推出以來，一直憑着其全天候性能而備受車迷追捧，但有部份地方仍須略加強化，才能將性能完全發揮；而今日為大家介紹嘅呢部改裝Allroad，就係針對車子本身嘅弱點加以強化，從而令性能表現更上一層樓。有興趣嘅朋友，就唔好錯過今日嘅介紹喇！
記者、攝影：郭信強
車輛提供：TWAutosport（21420001）
從外形上，你好難察覺得到呢部Allroad曾經作出改裝；但當細心留意下，不難發現佢加裝有原廠AudiSport尾翼，就連車頭鬼面罩亦換上特別訂做嘅Kamel產品。車廂布局以豪華實用為主，承托力極高嘅真皮座椅，以及齊全車廂設備，全都被保留下來，但腳踏則換上Raid嘅鋁合金製品，望落夠晒突出之餘，而且重有防跣腳功能呢！
雖然Allroad已用上一套高性能制動系統，並且表現重一啲都唔差，但由於車身較重及分布並非如RS4般咁好，所以制動系統往往會出現因過熱而減低制動效能嘅情況；但換裝上一套Brembo嘅四活塞連322mm煞車碟嘅制動系統後，制動效果明顯較前增強不少，兼重有良好嘅持久性，就算長時間作多次緊急煞車，都仍然有唔錯嘅制動效能。另外重改換上Brembo迫力鋼喉，可抵受更高嘅壓力之外，耐用性亦被原車嘅膠喉來得更好呢！
而Allroad嘅另一個最大弱點，就係引擎室內嘅V形Turbo入氣喉，由於長期承受頗大壓力，中間位置容易出現裂口，每用上一段時間便要將之更換；而車主就特別為其換上Samco嘅矽膠高壓喉管，佢除咗係專為Allroad而訂做，可配合原裝嘅中冷器使用外，重可以解決耐用性嘅問題㖭！
除制動系統有所改動之餘，車主亦特別為其改換上BMC嘅F-1高流量風隔，除吸風量比其他同級產品來得更高之外，阻隔沙塵嘅效能亦較好，就算長期使用都可以減少進氣歧管嘅污染問題。而放氣Valve亦改換上Forge嘅兩段式放氣設計，外觀與原裝嘅一模一樣，但由於佢嘅內部結構係以鋼造嘅薄膜為主要洩壓氣閥，比一般膠製嘅產品來得更耐用，而且佢重以兩段式排氣，駕駛者唔使自行調校，而放氣量亦唔會影響馬力嘅輸出呢！
點睇改裝Allroad
德國車改裝專家Tony認為，Allroad本身經已係四驅車中之王，因為佢本身已擁有一套恒式四驅系統，以及可作高度調校嘅懸掛組合，無論係On-road抑或係Off-road都不成問題；但Allroad本身仍存在着一啲損耗性嘅弱點，呢啲弱點多數發生響Turbo裝置及制動系統等地方，兼且重有可能影響行車表現呢！故此響改裝時，只需集中解決佢嘅弱點便可。