近年是非纏身嘅職訓局執行幹事李鍔，下個月退休。八方噚日喺職訓局轄下嘅香港專業教育學院畢業禮上，見到最後一次以主人家身份出席嘅李鍔，問起佢未來動向，李鍔自爆明年一月會重返港大執教鞭，開一門新課「戰爭與和平」，重千叮萬囑八方廣為宣揚，話希望多啲學生報讀喎。
畢業禮上又見到身兼職訓局主席嘅楊啟彥，李鍔同楊主席都算難兄難弟，大家都惹咗好多是非。
曾任港大文學院院長及專業進修學院院長嘅李鍔，九七年上任以來，主要俾人力數「四宗罪」：先被批評課程改革不力，再被投訴年滿六十仍霸佔高位，不願退休，最近更遭匿名信指摘揮霍及用人唯親。
講到工作，李鍔仍然顯得意難平，強調佢將課程改革做得好好。不過一講到自己即將再執教鞭，佢成個人開心輕鬆得多。梗係啦，李鍔一向係軍事專家，講「戰爭」開正佢嗰瓣，況且經歷完呢幾年風風雨雨，相信佢對爭鬥會有更深體會。
至於楊啟彥，噚日致辭大講就業危機，話經濟轉型，令每年未能及格畢業嘅幾萬名中五生變成計時炸彈，咁咪即係要靠職訓局去拆彈？
傳真︰2623-9278
電郵︰