去朋友屋企食飯就最開心，因為他們會準備最好的材料給你，當你等食之際，他又會叫你隨便睇電視，打遊戲機，最好是唔使做等食，可惜不能日日如是黐飲黐食。幸好識到Wilfred及Cassandra這對小情侶，可以日日去食上海菜、睇電視、打遊戲機都得，分別是臨走時要放低銀両！
記者：陳冰麗
攝影：陳智良
第一次上到Wilfred及Cassandra的私房，以為自己入錯人屋企，一點也不像私房菜的格局，一般的私房菜都有兩、三張枱，地方整齊，而這裏一邊放滿日本精品，一邊有舒適的梳化座椅、電視、遊戲機、電腦等設備，帶點凌亂，與一般住家格局無異。他們招呼我坐下便繼續入廚房準備今晚的飯餸，Cassandra一邊在廚房忙碌，一邊大叫：「你自便啦，隨便睇電視、上網、打機，唔得閒招呼你喇！」
與Wilfred及Cassandra閒談，估不到他們很健談。原來兩人日間都有一份正職，男的在銀行工作，女的則從事保險，煮食是他們的共同興趣，因為爸爸的影響而令自己也好客起來，Wilfred喜歡招呼朋友到家食飯，但礙於屋企地方有限，於是就利用做精品店，建立他倆另一個家，而這裏更成為他們與朋友敍舊的私竇。
問及搞私房菜動機，Wilfred直言：
「一來可以方便同朋友敍舊，二來又可以發揮自己嘅廚藝。」
「爸爸係上海人，文革時因為入過牛棚（拘留所）而認識咗一個御廚，喺彼此傾談之下，交流咗煮食心得，爸爸亦係好客之人，經常都會喺屋企設宴，我家陣嘅廚藝一半都係偷師所得。我專責煮上海菜，而女友最擅長煮廣東菜、中式糖水、海鮮。」
前菜
一啖一個好鮮味
賣相相當精緻，晶瑩剔透，一個剛好一口，入口即溶，因為用了雞湯、金華火腿、瘦肉等所炮製，難怪鮮味十足，無味的鴨舌也變得香濃味美。
主菜
以鮮茄代酸醋
細細件排骨容易入口，酸甜帶香辣，夠味又夠香濃。Wilfred以鮮茄代替醋做酸味效果，再混和炒香的薑茸、辣椒、上湯、糖一同煮成酸甜汁，然後放入走油的排骨兜勻，淋上碟再撒上少量鎮江香醋令其更添色香味。
湯
帶爽兼滑溜
薺菜是上海一種野生蔬菜，有種獨特香味，食落帶爽，專用作包雲吞、做湯羹，配以有味豆腐，湯羹即時變得更具食味，清爽而滑溜。
甜品
加碎冰糖再倒干邑
這是一款西式甜品，是Wilfred及Cassandra合力創製的。先將士多啤梨洗淨，抹乾水份，加入舂碎的冰糖粉，再倒入干邑酒或XO浸至入味，約兩、三小時完成。Cassandra睇通女士較愛Cream狀物，所以最後在士多啤梨面唧上適量鮮忌廉，令賣相吸引之餘，亦增添香滑。
Wilfred及Cassandra對煮食都好有熱誠，從他們慢工出細貨就知道，食完前菜水晶鴨舌，等了大半個鐘，主菜才登場，糖醋小排骨，賣相平平無奇，但食真啲，味道香濃，比一般上海菜館更為好味，不但酸，還帶香，是我的心水推介。
食客意見
後記
Cassandra及Wilfred搞私房菜純為興趣，廚藝雖然稱不上專業，但身在這裏勝在無拘束感，好似返咗屋企一樣，至於菜式方面，食慣的上海菜畀我一種油淋淋感覺，但這裏的上海菜，風味依舊，卻較清爽。
地址：銅鑼灣區（可先致電查詢詳細地址）
電話：28901130
營業時間：12:00nn-9:30pm（星期一至四及日）、12:00nn-12:00mn（星期五至六）
收費：2位起，每位$250（菜單視乎客人budget而定，包括四個前菜、一個湯、八個主菜及兩個甜品，合共十五道菜）