謝霆鋒就串謀妨礙司法公正罪名提出上訴，名嘴鄭經翰認為他此舉是不智的行為，因為會讓人覺得霆鋒不肯承認錯誤，製造讓人攻擊的機會。
謝霆鋒串謀妨礙司法公正罪名成立，判社會服務令二百四十小時，其後律政司指判刑過輕，但主審裁判官維持原判。據知霆鋒已就定罪提出上訴，而負責上訴的律師，仍然是「金牌大狀」清洪。而律政司方面，昨日已決定不再就霆鋒的判刑作出上訴。
名嘴鄭經翰（大班）對於霆鋒上訴一事，覺得是不智行為，他昨日接受本報電話訪問時說：「我唔明佢點解會咁做，當然每個人都有上訴嘅權利，呢個係大原則，但咁會對佢好不利。本來可以將呢件事拋諸腦後，但上訴又要搞幾個月，對佢嘅精神壓力都好大，而且會俾人覺得佢唔肯承認錯誤，之前已經有好多人嘈喧巴閉，𠵱家盞俾人哋攻擊。
「我真係唔明點解佢會上訴，雖然佢會有案底，但只係好輕微啫，幾年後就可以洗底，根本好小事，只要坐監唔超過半年，都可以選立法會議員啦，我覺得佢咁做係不智嘅行為，我喺度祝佢好運。」
而律師謝偉俊則指霆鋒上訴效益不大，他說：「佢唔上訴，社會輿論會平息得快啲，就算上訴得直，人哋都會覺得佢有錢請個有能力嘅律師，喺社會同歌迷心目中都會扣分，因為不論佢喺法律上有冇罪，輿論已定咗佢有罪。」
謝偉俊續說：「我覺得件案本身未必可以入罪，但既然入咗罪，刑罰就太輕，起碼要坐半年。喺法律上，係有機會博嘅，根據報紙嘅二手資料，我覺得有機會打得甩。」
而霆鋒的經理人霍紋希，昨日則在電話中說：「霆鋒上訴事件現正交由律師處理，現階段冇任何事情或消息發表。」
採訪：張止寒