前兩日有小道消息傳出，話政府已經同廣東省政府就港深兩地二十四小時通關傾掂數，重話好快有結果。消息一傳出，唔少人即刻跳出嚟支持，但行會成員田北俊噚日開完人大選舉會議，就好權威咁話未聽過呢件事，消息係「流」喎！
田少細佬田二少都話政府未同九鐵傾過呢件事，而九鐵上水以南嘅路段，日常有好多維修工作，根本唔可能做到二十四小時通車，如果要做就只能麻煩市民搭其他交通工具去上水，再由上水轉搭火車去羅湖！不過咁，即使上水去羅湖嘅火車，都唔係一星期七日可以二十四小時通行，因為點都有啲維修，除非有第三條路軌啦！
不過，以前擔心二十四小時通關拖低樓價嘅地產商，都已經因為香港樓價低到暈而唔再擔心。嘉華國際集團主席呂志和講到新界嘅樓價就最白：「你唔買就笨嘞！」不過八方都係覺得小心為上好啲。
傳真︰2623-9278
電郵︰