一直以為返深圳做衫同買家具係年長一輩的玩意，殊不知身邊那對剛結婚不久的年輕朋友，竟然都返深圳買家具，好奇心驅使下，一於去呢對朋友嘅屋企睇睇。發覺家具款式沒有想像中老土，而且質料都幾實淨，聽佢哋講，深圳嘅洪湖區係家具店集中地，於是上星期六上去行咗轉，發覺內地嘅家具店規模大，款式選擇多，香港真係無得揮！
記者：歐嘉荃
攝影：Manny、陳良
「嘩！」絕對是踏入家具店的第一個感覺，面對着仿羅馬式的古典裝修，再加上各款名貴家具，讓我有如置身豪宅之中。店舖佔地五萬多平方呎，雲集了百多個世界各地的家具品牌，售價由千幾蚊到二十幾萬人民幣都有。訪問中見到一對為新居選購家具的盧氏夫婦，一於睇吓佢哋有乜嘢心水選擇！
Gucci梳化實在太貴，盧氏夫婦轉移揀了這張兩座位梳化，「聽老闆講，呢張梳化屬於巴黎Eiffel品牌，全張梳化用仿皮製成，質料都算OK！不過我最欣賞都係佢嘅顏色配搭，橙色配黃色夠晒特別！」
店舖售貨員常先生話，香港人通常都會買啲Size較細嘅家具，「最受港客歡迎的首推這張連電話几的木櫈，全張以實木製成，雕刻和圖案均由人手雕繪，配合藍色的絲絨櫈面，高雅大方。」
想搵較年輕較摩登的款式，就要去總店昅昅，我就喺店內搵到Innovation的家具，呢張香港都有得賣嘅Morph梳化床，我一早已經喺香港睇中，奈何差不多$6,000嘅價錢實在太貴，始終唔捨得買，喺呢度全張梳化床連墊及布套都只係?3,600，連埋千幾元嘅運費，計落都算抵。
話晒都走年輕人路線，梗係要有啲別出心裁嘅設計，好似呢張櫈，我同攝影師都十分鍾意，全張用軟腍腍嘅海綿做成，摺埋好似半邊鹹蛋咁，將蛋黃拉落嚟就可以變成單人梳化，設計夠晒特別。
注意事項
1）場內的貨品不設訂做。
2）送貨期大約1星期至20天不等。
3）運費已包括安裝費，運費以款式計算：
單座位梳化、餐枱、電視櫃、地櫃、書櫃：?990
兩座位梳化：?1,500
三座位梳化：?1,980
茶几：?510
組合櫃：?1,350
怡豐名家具
地址：深圳市洪湖路碧湖花園商業城A區（總店）
電話：(86)75525610688
地址：深圳市洪湖一街二號（分店）
電話：(86)75525665333
營業時間：10:00am-10:00pm
實戰港客
我認識嘅年輕夫婦，就係Dick哥Dick嫂，佢哋嘅家具就係喺深圳怡豐總店購買。阿Dick話，全屋嘅家具，好似梳化、電話几、餐枱、鞋櫃、書櫃等全部都係喺深圳買，買咗大約一萬蚊，運費就二千幾。「雖然價錢唔算好抵，不過質料就真係唔錯，啲家具用咗差不多一年，除咗套米色梳化污糟啲外，其他重係好新淨。」
「購買時要留意佢哋幾時送貨，初初佢哋話半個月就有貨，後來等咗兩個星期連影都無，結果要打長途電話返大陸追，嘥咗唔少長途電話費先知啲貨已經嚟咗香港，只不過香港運輸公司未送貨，差不多等咗一個月，啲家具先運嚟，我諗各位買家具時要追得緊啲。」
Dick嫂最鍾意就係呢個電話几，三層的櫃桶可以放置雜物，而几頂重有盞燈，設計幾特別。
兩公婆最鍾意呢張皮梳化，「張梳化啲彈弓好靚，唔會好似香港啲咁硬磞磞，真係好坐到唔捨得郁！遲啲我哋會去深圳睇過張梳化，不過點都唔會買米色，太淺色唔襟污糟，都係轉張深色好啲！」