正所謂物以罕為貴,任何貨品只要印有一個「限量發售」的嘜頭,頓時升價百倍;如同幾咁名貴的手表,如果通街人人都手戴一隻,點睇都唔夠矜貴。聽日開始,銅鑼灣有一間上樓表行,將旗下獨家引入的各路時款手表,全部以低至3折發售,部份款式重係全球限量版,隻隻都刻晒靚冧巴保證限量發售,擔保唔怕同人撞到正,趁住聖誕將至,買定來送禮就啱晒啦!
記者:尹珊珊
攝影:伍慶泉、黃子偉
來自日本的美少女樋口明日嘉(Aska),雖然唔係天生儲表狂,但講到買表就意見多多:「揀表最緊要個款夠靚,要望埋去夠搶眼,同埋配合番自己身份,好似男裝表一定要感覺夠Man,價錢唔係太貴的話,唔會太講究有咩功能。」講到尾,原來全世界的女性都係一樣,買表都係以合眼緣為準,𠵱家就睇吓Aska會揀邊類型的手表送畀自己、男朋友同好朋友先!
原價:$1,550 開倉價:$780
如果大表面設計係男裝界代表,咁呢款長身酒桶形表面可算是女裝界的典範。呢隻全球限量30隻的YuppiesTokyo女裝石表,仿古設計,小巧的表面高貴典雅,一表兩帶,可以按自己喜好自由配搭,方便襯衫,而表身更鑲嵌有30粒捷克晶石。
Aska:「本身打扮都比較女性化,揀表送禮會偏向Lady一點的款式,呢隻仿古表雖然唔係真石,但係無損貴氣,就算去Party時佩戴亦唔失禮。」
原價:$1,800 開倉價:$780
全球限售100隻的Mercury貝殼面手表,表面以幻彩色的貝殼製成,配以捷克石砌成的數字,外形搶眼煞食,再加上表面蓋有激凸放大鏡,遠一遠都望得見,擺明款式行頭,功能其次,自問型男索女又點會錯過!
Aska:「我會揀呢隻表畀我個日本朋友仔Mari,一來佢平時戴開細表面的表,呢隻會好唔同,而且我鍾意佢顏色夠Sharp,個款又得意,襯番一身型女打扮就最適合。」
原價:$3,200 開倉價:$880
男裝表從來都以穩陣行頭,呢隻YuppiesTokyo全鋼表設有特大表面,食正今期潮流,又托得起男性的粗手腕。至於內涵方面,此表有三個計時小表盤、具防水及夜光功能,兼夾鋼水斤両十足,拎上手已感覺很有份量。此外,值得一提是此表全球限量僅30隻,頭15隻為銀色表面,其餘15隻為黑色表面,購買時不妨自選一個心水編號。
Aska:「始終覺得男仔戴大表面最好睇,畀人有男人味的感覺,其實自己都想買隻BoySize的手表,但係自己手腕幼,唔係咁好睇,都係買畀男友算了。」
日本手表品牌YuppiesTokyo只不過得短短四年貨仔,已發展出一套獨特風格,專攻年輕人市場,款式一味以young行頭,就算連表帶都唔放過,除了一般皮帶以外,重將其他物料如毛毛表帶、牛仔布帶等發揚光大,開宗明義屬典型後生仔女的飾物表。
另一特點係每隻表款的產量一定唔會多,通常全球限售30隻至100隻,反而表款種類就比較多元化,近呢幾個月重出埋男裝全鋼計時表,似要打破飾物表予人中看不中用的感覺。與手表份屬同鄉的Aska就話:「印象中好多年輕人都鍾意呢類飾物表,但之前見親都係大表面,唔係咁啱自己。」
其他精選靚表
原價:$3,200 開倉價:$980
此表最特別是表帶以一塊印有意大利地圖的布裁製而成,呈凹凸立體的18K金表殼,無一般方形表咁呆板,獨立秒盤設在表面底下的設計,亦比一般手表少見,表面有黑、白兩色可選,情侶們重可以買齊男女裝以示恩愛。
講到意大利AlvieroMartini手表,大家可能唔係咁熟悉,不過如果提起多年前曾經風行一時的地圖袋,相信會喚起大家少少印象吧!意大利籍設計師AlvieroMartini除出產時裝同手袋之外,自89年開始已涉足手表界,近日才登陸香港。
原價:$3,200 開倉價:$880
揀表款,其中一樣係睇表形,呢隻來自日本的YuppiesTokyo酒桶形手表,擺明車馬主攻年輕人市場,表肉有獨立秒盤,設計新穎之餘,同時兼顧計時功能。此表以鋁質製造,質料勁輕,較市面一般手表罕有,最適合戴唔慣表的人,再加上現時全球限量只有30隻,每隻表後面均刻有生產編號,就算買來收藏亦甚具價值。
原價:$1,200 開倉價:$980
揀表款最重要係切合自己一身裝扮,好似返開寫字樓工的OL們,平日衣着打扮講究斯文大方,一隻款式高貴的手表可謂最佳裝飾品。呢兩款由法國品牌MarieClaire生產的女裝手表,表肉同樣在有鐘表王國之稱的瑞士製造,具有一定的信心保證。性格斯文的OL可選鵝蛋形的晶石手表,側邊鑲滿天然水晶石,閃閃生輝,夠晒女人味,有黑色或白色漆皮帶可選。至於風格踏實的OL就最適合佩戴呢隻立體方形手表,表面精緻小巧,表殼比同類型女裝表款具立體感,表帶可自選杏色或黑色皮帶,開倉價同樣為$980。
原價:$4,800 開倉價:$980
同樣是AlvieroMartini出品,比起地圖表帶的款式少了一份花巧,取而代之是以實用功能行頭。先說此表的質料以全實心鋼製造,配上穩陣的蝴蝶表扣,符合實淨襟戴的經濟原則,款式方面則以還原基本法為大前提,黑、白或銀色的表面刻有意大利地圖作裝飾,花花綠綠的圖案欠奉,屬長青又襟興之選,最適合買畀保守的成熟女性。
STARWATCH
地址:銅鑼灣景隆街7號顯輝中心12樓全層
電話:28219736
開倉日期:12月5日至12月24日
開倉時間:上午11時至晚上9時
備註:所有表款均附有1年保養