隨着3G通行的日子愈近，大家對於將有何種手機用亦特別着緊，𠵱家喺灣仔會展舉行的亞洲電信展中，亦發現不少打正旗號的3G機，其中來自日本品牌的就特別多，究竟未來所用的手機會是何等模樣，就等日本各大品牌話你知。
記者：招佩珊 攝影：陳智良
「好大部喎！」不過攤位個姐姐仔就話唔算好大部，勝在功能夠齊，一口氣數出的包括PDA、影相、拍片、視像會議及上網等，而佢手上嗰支唔單止是Stylus，亦是遙控器，聽歌睇片一㩒掣就OK。
別以為是一般摺機及直身機，其實內有乾坤，要影相先要拉開機殼，對摺機的鏡頭藏在機面，下面則為彩色副屏幕，而拉開直身機機背就見到鏡頭。
機內一個芒，機面一個芒，面芒更可拉出、旋轉然後拍住機內個主芒一齊睇，而機內外合共有兩個鏡頭，拍片之餘亦有3倍變焦功能。
機身看似很長，但只是將鍵盤拉出再揭開副屏幕，換言之，機身原先好細部。將正副兩芒一齊用，睇片睇相就更清楚，等同打直放的16:9，雖然隔得遠咗少少。
打破現有的65,000色，呢部設計與7650有點相似的影相手機，備有260,000色彩色屏幕，單以數字睇就絕對超晒班，但個芒大極有限，65K同260K睇落分別唔大。
視像會議是3G的重要一環，聽就聽得多，今次有即場示範，體會到傾電話時見到對方個樣是何等模樣（當然你個樣同時亦被對方睇到），我覺得比較麻煩的是每次通話前都要執正個樣。