吳鎮宇前日喺泰國迎娶女友王麗萍，正式結束佢嘅王老五生涯，噚日下晝鎮宇同老婆、以及老友劉青雲、張達明同黃子華等幾pair人繼續留喺泰國吃喝玩樂，而鎮宇嘅老婆因為冇化妝，所以唔想畀記者影相。
鎮宇話前晚婚宴搞到半夜十二點幾先至散席，其後一班親友重去咗佢間酒店房玩新娘，一齊飲紅酒食雪茄傾吓偈，不知幾咁開心，所以噚日晏晝至蒲頭。今次鎮宇專程帶咗四支珍藏嘅82年紅酒過嚟泰國，佢話早幾年有個朋友經濟出現問題，以低價讓咗呢批酒畀佢，價錢由萬幾蚊到幾萬蚊一支，加加埋埋都差唔多要成十萬㗎！鎮宇話平日梗係唔捨得飲啦，留番今次咁嘅喜慶日子先至攞出嚟歎！
鎮宇又話張達明早排喺北京拍《老鼠愛上貓》嗰陣，錄咗劉德華、黃秋生同埋劉偉強嘅一啲祝福說話喺婚宴入面播，對白重好抵死喎，不過究竟點抵死法呢，鎮宇就冇講到！
關心妍（阿Jay）最近獲萬事得車行邀請擔任全新型號Mazda2嘅代言人一年，並獲贈新車一架。今後阿Jay一切有關架車嘅費用都由車行支付，包括停車場費同油錢等，噚日阿Jay就去咗葵涌陳列室攞車，佢好開心咁話：「黃色嘅車款暫時全香港只得一架，車行重提供咁多嘢畀我，今次真係慳唔少！」
陳慧琳（Kelly）喺日本知名度真係愈嚟愈高，噚日佢喺當地出席舊作《薰衣草》嘅記招嗰陣，重俾人選咗做最佳衣着人士，同日本其他社會名人齊名。每年一度嘅最佳衣着人士選舉，今年已經係第三十一屆，今次有份得獎嘅重有日本女星菊川怜，官房部長安倍晉三同球星宮本恒靖等。
張惠妹早排接受商台訪問，原來佢已經練到跆拳道兩段，又話平時最鍾意做有速度感嘅運動，所以唱快歌特別有爆炸力！至於唱慢歌容易喊，係因為佢全情投入去唱，唔會刻意掩飾自己！阿妹又透露，早排有個歌迷希望佢寫封信畀佢死咗嘅女友，話畀佢女友知阿妹係好愛佢，因為佢生前好鍾意阿妹，阿妹聽到好感動，即刻達成佢嘅願望。
電視劇《皆大歡喜》噚日喺粉嶺雲泉仙館拍攝外景煞科戲，除咗四朵金花之外、重有薛家燕同埋大住個肚坐埋一邊嘅車婉婉㖭。車婉婉自爆就快會出新書，今次佢唔只講星座，重會提到感情事，但係就唔係同圈中人嘅感情！問車婉婉點解唔寫埋，佢話：「我入行之後都冇乜感情事，有都畀你哋寫晒啦！」