GAMECUBE年尾壓軸大作《薩爾達傳說：風之指揮棒GC》，預定要12月13日先正式見街，不過任天堂喺11月28日開始接受預訂後，會附送一隻預約特典，入面收錄兩隻N64嘅《薩爾達》名作，有部份機迷更可即場攞走呢隻預約特典，香港亦有部份Game舖入到呢批預約特典，不過就並非送給預訂嘅客，而係單獨售賣，價錢更一度炒至六百蚊㖭。
記者：徐影龍
逢星期一至六刊出
當任天堂宣布11月28日預訂《薩爾達傳說：風之指揮棒GC》，可免費獲得一隻預約特典後，立時令定單數量大增，28號當日，日本Game舖更出現罕見嘅排隊預訂情況，可見呢個預約特典的厲害。由於只限預訂咗嘅機迷，數量又有限，所以香港一啲Game舖索性將預約特典單獨炒賣，首日最高峯曾炒到六百蚊，目前已降價到三、四百蚊，據知情人士透露，相信遲些會有充足貨源，Fans不用急於捱炒價。
除咗兩個版本嘅《薩爾達傳說：時之笛GC》外，預約特典重包含一大堆新Game預告，除已推出嘅《MarioParty4》同《BioHazard0》外，重有《F-ZEROGC》、《BioHzard4》、《DeadPhoenix》、等多款CAPCOM大作力撐，GBA方面亦有《薩爾達傳說》及《FFTACTICSADVANCE》等，未有得玩都可以睇片頂住癮先。
呢隻碟最大賣點係收錄當年N64嘅《薩爾達傳說：時之笛》，及從未公開過嘅64DD（N64的磁碟機）版《薩爾達傳說：時之笛（裡）》，兩隻Game都屬完全可玩版，能夠完整咁由頭打到尾爆機，Fans當然翹首以待，以一碟價錢玩齊兩隻Game，難怪被Game舖炒起嚟賣。
首先玩到就係當年N64版本嘅《薩爾達傳說：時之笛GC》，遊戲流程同以前一樣冇變到，基本上屬完全移植版本。由於佢係任天堂首次將薩爾達立體化，當年嚟講的確厲害，不過以現今尺度嚟睇當然有所不及，雖然冇用盡GAMECUBE機能，多邊形數量及貼圖質素都冇提升，不過流暢度更勝N64版本，最明顯係好多遠景能即時處理呈現，唔會好似以前咁行到埋去先見到。呢個遊戲當年獲獎無數，不少Game評都給予爆燈嘅分數，遊戲性一流，又有豐富嘅解謎要素。今次Load碟情況亦令人滿意，就算當年已打爆機，都好值得回味一下。
至於另一隻謎一般嘅《薩爾達傳說：時之笛（裡）GC》，講穿咗其實即係N64嘅高難度版本，當年預定係隨幻之磁碟機64DD推出，可惜最後胎死腹中，到今天終於重見天日，機迷可一試呢款名作。遊戲故事同舊有版本完全冇分別，畫質亦冇因而提升，變更點主要集中喺迷宮同敵人身上，好多舊有謎題解法已改變，加上敵人數量增多，如首個迷宮出現嘅花怪便會巨大化登場，難度倍升，適合玩過舊版嘅進階機迷。
預訂點：DreamStore（承諾《薩爾達傳說：風之指揮棒GC》賣價$500以下，預訂均送預約特典。）
地址：灣仔東方188商場256號舖
電話：25753285