上星期五寫《賓架開P》，馬主H睇完篇稿之後，就收到美林證券大賓架黃桂林寄嚟嘅請帖，邀請佢參加二十五結婚周年紀念酒會、晚會、舞會，由晚上七點直落至凌晨兩三點；大家玩到頂唔順為止。
馬主H知道黃桂林開party，有賓架可夾band演唱助興，但自問完全唔識唱歌，邊度敢上台出醜吖。香港嘅賓架，識唱歌嘅，屬於少數；台灣啲賓架，唔知係唔係自少讀書有音樂訓練，幾乎個個都識，而且唱得幾好㖭。我哋嘅教育制度非常不重視音樂培養，馬主H由細到大，都冇先生教佢唱歌，𠵱家就覺得好遺憾。
黃桂林搞party，另有一番意思。佢嘅請帖聲明：「各方朋友如想送禮物，請考慮以捐款代替，隨帖附上中文大學聯合書院嘅捐款表，請寄支票予C.M.Tai先生（聯合書院院務秘書）收。」黃桂林夫婦兩人都係聯合書院畢業生，在學校相識（般含道時代），眨吓眼畢業三十年。結婚二十五年，捐錢畀母校做獎學金，乃飲水思源，十分應該，黃桂林話啲捐款係作聯合書院學生獎學金之用，用嚟培養啲師弟師妹。
約兩個禮拜前，黃桂林與大摩、高盛等大行嘅投資銀行家返中文大學做careertalk，有百幾名學生參加，據黃桂林對馬主H話：「啲師弟妹好似都幾醒。」既然醒，就值得捐獎學金喇，各位K.L.Wong老友記得今次送禮賀佢，出手重啲呀！