年尾將至，小初同經紀黃商量，買一啲有基金揸住嘅工業股仔，博佢哋貨疏，在供求關係下，股價容易被Mark上。
好似富士高實業（927），自從早排公布惠理基金持有公司股權10.03%後，股價由0.85元升到噚日收市1.15元，隻股在周四公布業績，斷估重有一轉炒。
富士高因為惠理基金揸重貨，令公眾持股量跌至16.63%。公司話計劃在3個月內令公眾持股量增加至25%，但斷估都唔會在近期搞得掂，所以直至年底，隻股街貨應該重係好乾。
富士高7月時，公布截至今年3月底止全年業績，盈利較去年倒退9.4%，但仍然賺5642萬元，公司當時解釋係受到舊年911事件影響。今年再無911事件，加上公司又在8月份拓展大陸內銷市場，斷估業績唔會差，所以應該有得諗。
另一隻工業股愛高集團（328），同樣在周四公布業績，股價近期亦拾級而上，相信都係炒業績。
慕容小初