今屆重未贏過英超聯一場主場比賽嘅韋斯咸，前日迎戰修咸頓賽前放風話前鋒簡路迪復出，搞到本報名家戰鬥員A信晒，貼韋斯咸win，點知一見正選陣容，我求大俠就涼咗一截。
唔見簡路迪不特止，領隊羅達重用怪招，將後衞伊恩皮亞斯去做箭頭，同冇乜狀態嘅迪科合作，亦因為咁，伊恩皮亞斯嘅第一個入球球員賠率，由五十一倍急跌至三十四倍……但係捧佢嘅人一定好失望，佢真係「廖化」貨色，浪費咗唔少機會同隊友嘅心血。
我求大俠覺得唔可以怪晒伊恩皮亞斯，佢喺車路士出身時係踢前鋒，不過係九年前嘅事，突然間做咗最前嗰個，唔腳軟就假，怪只能怪羅達以為自己好有計，反而後備前鋒卡馬拉死都唔用，簡直就係自取滅亡，連韋斯咸呢支踢法幾悅目嘅球隊都俾佢玩死埋。
意乙聯拿玻里後衞巴甸尼上個禮拜五俾球迷襲擊，傷咗塊面，結果影響咗我哋體育版下個禮拜日嘅運作；冇錯，意甲聯就因為呢件事，將嚟緊呢輪聯賽押後十五分鐘開波，作為對呢類暴力事件嘅抗議，禮拜六嘅波影響不大，但係禮拜日嘅早場波就惡搞嘞，第一次版會冇賽果，各位讀者要多多留意同包涵！惟有第二次版補番。
皇馬對奧林比亞嘅洲際盃，前日一開盤皇馬就讓半球，噚日早段讓到一球，下晝三點啲飛側晒皇馬嗰邊，其中一間博彩公司索性封盤㖭；但開賽前皇馬盤路好似坐過山車咁，最後讓回半/一，反映波友審慎心態。結果技高一皮嘅皇馬𡁻兩粒，上盤客開顏，踢波始終講實力；當然，我哋嘅名家青蛙仔一擊即中，又要記一功。
早幾日NBA嘅湖人球星拜恩指名道姓，話自己既然能負傷上陣，傷勢唔會比自己嚴重嘅隊友沙馬基獲加都應該出賽，沙馬基即時回應話好「hurt」（痛心），指拜恩係質疑佢嘅人格。拜恩真係有口話人冇口話自己，自己獨食成日累球隊輸波又點計先，𠵱家湖人已經不振，重搞埋內訌嘅話，想四連冠真牙煙囉！
我求大俠有時真係好服新浪網記者嘅「創意」，好似上個星期日東道主法國明明喺台維斯盃網賽決賽輸咗畀俄羅斯，第二日新浪網登咗張法國總統希拉克招待台盃教職員及球員嘅相，但說明及標題居然話法國隊係奪冠球隊，天啊！唔該負責嘅記者望真吓人哋原裝正本嘅英文說明，千萬唔可以誤導讀者㗎！