恒指再升21點，中移動（941）喺大隻嘢中最出色，收21.75元，再升60仙，炒落後，向23元推進。昨日所提嘅Call輪9532，收23.8仙，升3.2仙，溢價縮到4.3%（前日5.7%），槓桿率9.1倍仍然夠大，數據吸引，跟正股移動，向30仙推進。
中銀（2388）企定喺8.50元，熱門長壽Call輪9462收13.8仙，跌4個位，本來已經吸引，跌後更加抵買，溢價得1.9%，有差唔多8個月壽命，溢價唔應該咁低，而槓桿率6.2倍，亦唔算低，揸9462唔使點怕輸溢價。正股4個月前上市，招股價8.50元，𠵱家又係8.50元，聖誕鐘炒滙豐（005），冇理由中銀成日都係企定喺8.50元招股價嘅。到明年第1季，中銀有機會升1成，9462就有6成升幅。中銀升5%，隻輪都升3成。
新基（301）同太港（659）嘅改組大會，下周四召開，開始有人發功，新基昨日上升6.4%，太港有8.2%進帳。新世界（017）冇升冇跌。百億改組計劃若獲通過，新世界點都有啲沖喜作用，新世界股價較資產值又有大折讓，有可能趁機炒起。
改組用數以億計費用，冇理由咁大陣仗搞完一輪後大細股東都冇增值到，新世界Call輪9474值得趁低買，炒賣點係槓桿率有19倍，好夠爆炸力。
章盛