一群雀友聚會，不為攻打四方城，而是交流鸚鵡經。60個主人加40隻鸚鵡；人聲加高八度的「哈囉」、「多謝」、「早晨」等鳥語，熱鬧到震！這場鵡林聚會，由成立了僅3個多月的香港鸚鵡會籌辦。早前已經燒過幾次嘢食，但都理所當然地約在郊區，但今次竟然High到移師五星級港麗酒店食TeaBuffet！場面絕對搞鬼！
記者：吳佩璇
攝影：黃子偉
原來人工繁殖鸚鵡都只是近二十年的事，以前一眾鳥癡多養野生鸚鵡。但養野生鸚鵡一來有違保育意識，二來野生品種始終野性，其實不宜家養。但自從人工繁殖漸趨成熟，鸚鵡的價格跌近4成，3、4千已買到不錯的純種鸚鵡，性格也溫純得多，飼養鸚鵡就慢慢流行起來。
養有兩隻鸚鵡的張生，有感香港沒有一個講鸚鵡的網頁，便搞了個個人網站，才發現原來香港也有不少人養鸚鵡，便下定決心聚集志同道合者，搞了這個鸚鵡會，自己擔任會長。由8月成立至今短短3個零月，已有667名會員！每次聚會閒閒哋都有六、七十人出席、三、四十隻鸚鵡參加，一呼百應！
鸚鵡仔怕凍，加上對上幾次聚會都在郊外，於是諗到不如去酒店食Buffet！於是向衞生署查問，才發現寵物的定義不包括雀仔，牠們可跟埋人入餐廳。會長張生話：「都有酒店驚影響其他食客，又驚啲鸚鵡有菌而拒絕我哋。」反而五星級港麗酒店一口應承，於是就齊齊嚟食TeaBuffet。
共養2隻鸚鵡的阿June，今次帶咗藍黃金剛女BB嚟食Buffet。每朝阿June返工，另一隻鸚鵡會嘈住唔捨得佢走，但BB就例牌話「走啦，得㗎喇。」最激氣係每次鬧親佢，都係嗰句「得㗎喇！」搞到阿June唔知好嬲定好笑！「其實平時連商場都唔敢同佢入，今次帶佢嚟，威吓之餘，重可以請教其他人養鸚鵡心得。」
好叻打觔斗的MugMug、瞓水杯的蛋旦，都係Jess的愛寵，屋企重有3隻冇湊嚟。而手上呢隻MugMug最鬼精，最鍾意自言自語，「MugMug講Hello吖。」「Hello。」「MugMug講早晨吖。」「早晨。」佢重識吹口哨㖭！「其實鸚鵡好聰明，唔難訓練，只要將佢個頭㩒低，佢就自然咁翻一下，教咗2星期就識自己打觔斗。」所以當日MugMug攞咗個最佳表演獎，真係實至名歸，至於阿黃就憑起冠個靚樣，得到最受歡迎獎。
另一位成員Kenny養有1級保護嘅朱露冠鸚鵡Oscar，牠來自菲律賓有名的繁殖場，要成兩萬幾銀！「覺得佢顏色好靚，興奮嗰陣啲毛鬆起晒好似棉花好得意。後來透過鸚鵡店再買，先知全世界野生嘅得番8千幾隻，係1級保護。淨係申請入口都要成個月！」
鸚鵡會會長張生話，成立此會希望宣揚保育訊息，尤其鸚鵡這類高智商動物，若遭人拋棄，會掹晒自己啲毛發洩，甚或抑鬱至死。早前他們已帶過3隻鸚鵡探訪2間小學，遲啲重希望可以仿效狗醫生，帶鸚鵡到孤兒院、醫院，帶給人歡樂！
香港鸚鵡會網址：
難得一班雀友聚頭，講多過食：「哎吔！你嗰隻啲毛色咁靚嘅！」「你點教佢數數目字？」至於一班鸚鵡仔，有啲怕醜到暈，明明識講嘢都變啞仔，有啲High到狂瀨屎兼起晒冠，重有啲扭盡六壬表演身懷「鵡」功。
最勁都係我蛋旦，可以喺隻杯上玩摺埋。事關有次主人要我瞓低，然後就走咗去睇電視，唔記得咗我，搞到我摺足成個鐘，兩隻腳仔硬晒軚！所以話呢，成功非僥倖！
我識唱《PopeyeTheSailorman》，又識數1至10，不過倒轉晒！
玩法：不外乎玩品種、顏色、講話同做動作。
－品種：鸚鵡分3級，1級須申請領牌，故大部份玩家都養2級品種。至於3級則較便宜，如小葵花。
－顏色：個人喜好，不一定愈七彩愈靚。
－說話：以灰鸚至掂，可學多達5千個字！
－身手：論身手靈活，要數葵花鸚。
身價：3、4千已買到不錯的品種。目前以1級保護的GangGang最值錢，可達二十幾萬！而香港最多人養的是LoveBird，百零蚊就有。
食物：一日2至3餐，主糧為合成飼料，已含鸚鵡所需的各種營養。大部份鸚鵡食齋，也有些會吃昆蟲、少量肉或蔬果等，月花一、二百都搞掂。
去街：出街時多加條腳鏈，又或幫鸚鵡剪毛，等佢飛唔起。
智商：有人3至5歲的智慧，非常聰明，約6個月大已識講第一句話，性格多活潑貪玩，閒閒哋有三、四十歲命，金剛、大種葵花等更可有70歲命。