有葡萄牙人血統的Carson，個個叫他Uncle，由細到大生活在上環，行落樓好多老街坊都識佢，識飲識食、肥胖身形及口齒伶俐的基因，完全遺傳給做大廚的兒子Patrick，一老一少做私房菜，故事聽了三小時都未完……
記者：梁佩芬 攝影：陳穎
做開名牌手袋代理的Carson，一次到法國入貨，無意中到了當地一個鄉村，發現兩個農家世代生產葡萄酒，但苦無門路，頂好的出品都沒有向外出售。嗜酒的Carson說服與他們合作，將其獨特的紅白酒運來香港。從此，便開始做洋酒批發代理，也是私房菜的雛形。
每次洽談生意時，好食的他都會煮幾味來佐酒。三年前，一名商家覺得他煮食技巧了得，請他炮製一頓自助餐，一傳十，好多人都叫他辦Party。之後，便與做廚師的兒子商量開始做私房菜。每天他倆都親自到上環街市買餸，又一起找尋不同的外國食品代理商。Uncle做樓面，講到賺錢，他說：
「做咗三年都係吊鹽水，但我識到四方八面嘅朋友，一齊食嘢時嗰種Feel真係好緊要，畀人有Homely嘅感覺，唔係點可以一餐飯食三個鐘呀！」
Patrick做廚，同屋企唔開飯有關。以前，他們日日都上館子，老爸喜歡同廚師傾幾句，一次阿仔多口問，點解可以炮製如此爽滑嘅牛排，廚師笑道：「你有興趣就跟我學廚啦！」兩仔爺鍾意飲酒外，阿仔更好咖啡，還教老爸一起品嘗。又有一次，一名埃塞俄比亞咖啡豆的代理上來吃飯，同Uncle傾開，發現他也甚好咖啡，於是介紹這罕有的咖啡豆給他。原來，外國高級餐廳及五星級酒店都選用埃國的Mocha咖啡，而這裏$10就飲得到。
「入得一間餐廳食嘢就要信個廚師，佢煮乜就食乜，好多人都只會求祈比個Budget我，就煮幾道菜佢哋食，呢啲先考手藝。」Carson話：
入到去，你見到個活動餐牌走來走去，不是同客人吹水就是做樓面傳菜。最勁有個外國人單拖上去，不停咁食咗三個鐘，乜都試勻，千五蚊埋單走人。
「我叫佢淨食口乾乾，就送支紅酒畀佢解渴。」
這裏儼如一個酒庫，就地取材，煮食加兩杯酒都絕不出奇，難得是當Uncle興之所至，說不定捉着和你把酒談心，多多酒都任你飲。
意大利人只吃青口，但香港所有青口都是急凍，味道稍遜，索性改為用蜆，差不多每晚每枱客都Order，日賣成十斤。蜆用白酒、番茄及蒜茸清煮後便可吃。
法國入口肉汁多
法國人愛用牛油及肉桂煮過的蘋果或雪梨，令鴨肉更惹味。鴨胸從法國進口，經醃製及燒過，肉汁較多。
豬手焗熟後，再淋紅酒汁便成。去晒骨，入口不會滿口油。伴碟的椰菜仔外形特別，食落爽甜。
ClubdeSuccess
地址：上環文咸東街50號寶恒商業大廈101室
電話：25450833
營業時間：12:00nn-3:00pm;7:00pm-12:00am（逢星期日及公眾假期休息，有十人或以上預約除外。)
座位：40