民主黨星期日除咗黨慶兼賀前主席馬丁榮休之外，重係新任副主席何俊仁牛一，白鴿黨兄弟當然冇唔記得，重準備晒蛋糕為佢慶祝，一向玩得嘅何俊仁，亦唔介意兄弟攞佢嘅身高同專長──大懵冇記性嚟開玩笑。
身高五呎有幾嘅何俊仁，當晚以一個好特別嘅造型出場。八方見佢企喺兩個分別高六呎同六呎三、戴住黑超嘅猛男身前，基本上同一個小朋友冇分別；點知何俊仁突然舉高雙手，睇真啲，勁似《黑超特警組II》套戲裏面識講人話嘅八哥狗！
不過警犬一定比大頭蝦嘅何俊仁更有記性。話說一班民主黨核心去咗馬丁屋企傾偈兼開會，吹完水留番馬丁執屋，馬丁發現一部Palm，心諗有人唔記得攞嘢，除咗何俊仁重有邊個？
馬丁即刻打畀何俊仁，佢都話係自己留低嘅，重話遲啲攞番。點知一陣之後，李永達打電話畀馬丁問佢有冇見過一部Palm。
吓？睇怕何俊仁已經大懵到將所有唔見咗、留低咗嘅嘢，都自動攬晒上身！其實以何俊仁嘅記性，如果用Palm，又點會記得換電或者叉電？
傳真︰2623-9278
電郵︰