經紀陳噚日叫小初睇吓401控股（臨時編號2993），佢話隻股雖然大插水，但低位都見有人肯出嚟頂，加上有上海幫新主入局，斷估都唔會任隻股跌得太殘。
401首日併股，股價暴挫80%，睇到小初心寒。不過，隻股插到落7.5仙後，開始有人掛出買盤頂吓，雖然數量唔多，但都叫做肯接貨。
隻股噚日收8.2仙，微升1.24%，但成交金額只得17萬元，小初一個人都搞得掂。
經紀陳話，雖然隻股以往搞到唔湯唔水，但早排引入新主，相信唔會就咁乜都唔做，公司稍後會改名做上海華博控股，以反映新主嘅位置，所以佢覺得可以繼續留意。
另外，新醫藥（8085）噚日繼續大上大落，最高見0.34元，收0.231元，倒跌14.4%。雖然街外人士將隻股與日前中環命案扯上關係會有影響，但其實正如上周小初講過，任何經過重創嘅股仔，前途都唔慌好。
慕容小初