強伯不務正業，認識的流行歌曲，比所認識的師奶多許多，因為師奶喜歡有正當職業的男人。
認識的流行曲當中，我最愛的詞作，許多都出之許冠傑之手。在我心目中，許冠傑不只是「歌神」，也是我的「詞神」。他的許多作品，多年之後重溫，仍是那麼的令我興奮、感動，和忍不住再拍手再叫好再稱妙。
這首《有酒今朝醉》，是我的最最最愛之一，我忍不住把它抄了出來，和你分享一下。當中那句「行年十八歲，懶風趣，有名高級徙置區」，就令我笑到標眼淚，也眼濕到笑笑口。
《有酒今朝醉》許冠傑詞
「童年就八歲，多歡趣，見到狗仔起勢追。爺爺話我，最興嗲幾句，買包花生卜卜脆。跳吓飛機，街邊玩吓水，爺爺仲教我講呢一句，有酒應該今朝醉。
行年十八歲，懶風趣，有名高級徙置區。求其係派對，仆到去，見到丫烏都請佢。咪個謙虛，幾大充有水，連隨問吓佢幾多歲，有酒應該今朝醉。
行年廿八歲，金翡翠，鬢影衣香拖靚女。同埋趙阿翠雙雙對，結果終於娶咗佢。以為歲晚煎堆，點知啐聲跟咗老許；無謂望過去，盞心碎，有酒應該今朝醉。
行年六十八歲，腰骨都脆，阿嘅風濕中氣衰。人地窒兩句，濕濕碎，我都骨聲吞咗佢。嘆吓雙蒸，打牌抽吓水，回頭望過去，始終嗰句，有酒應該今朝醉。」
另：我已寄了一張支票（號碼769243），捐款給「蘋果日報慈善基金」，支票面額與這篇文章的稿費相同。因為，我不習慣把人家的作品抄了出來，稿費卻自己袋。