阿玲因婚姻破裂一度以淚洗臉，陷入人生低谷；在社工輔導及協助下，阿玲近月辦妥離婚手續，取得兩兒的撫養權，振作起來，決心勇敢面對前路。可是阿玲目前靠綜援金勉強維持家計，實無力應付搬遷新居的屋租、水電按金及雜費開支。蘋果日報慈善基金撥款助單親家庭阿玲三口解困。
阿玲向到訪記者細說﹕「我同丈夫協議離婚之後，即刻帶兩個仔搬嚟呢度暫住，呢度雖然係唐樓，又係六樓頂層，但租金一啲都唔平，要成四千蚊一個月。所以上個禮拜我收到房屋署通知有間公屋分配畀我，間屋月租只係二千幾蚊，我真係好開心，想即刻就搬，不過我冇錢點搬呢！」
三十八歲的阿玲，婚後在家相夫教子。任職中港貨櫃車司機的丈夫張先生，近年在內地包二奶，令阿玲一度情緒深受困擾，與長子需接受社工專業輔導。
「嗰段日子全靠明愛家庭服務中心嘅社工開解我，我至可以重新振作起嚟。大仔因為父母嗌交，家嘈屋閉，有段時間無心機讀書，而且成日粒聲唔出，要學校社工輔導佢，又同佢補習，𠵱家大仔已積極同開朗好多。」阿玲兩兒分別就讀小三及中一，現時學業成績皆屬中等。
在社工協助下，阿玲近日喜獲當局體恤分配公屋，得以減輕租金負擔及解決長遠居住問題。
奈何阿玲三母子目前依靠綜援金維持生計，按現行條例，社會福利署只會向領取綜援的長者及殘疾人士發放搬遷津貼，故阿玲一家除每月獲發租金津貼後，不會獲得當局額外援助遷居。
阿玲歎謂：「無論食用點慳，我都好難儲到筆錢搬屋。𠵱家經濟唔好，個個朋友都手緊，佢哋只能夠幫我搵到啲舊家具電器，錢方面真係有心無力。」阿玲訴說，自她產下幼子後脊椎移位，便無法從事重勞力工作，又因沒有工作技能，故難以覓得一位半職。
蘋果日報慈善基金了解阿玲三口的苦況後，即時撥款一萬元，助她支付搬屋費用，紓緩其經濟壓力。
捐款編號：C0761
暖流熱線
電話:29908688
傳真:23702192
電郵:
網址：