陳奕迅噚日去黃埔出席新城頒獎禮記者會，見Eason戴隻勞力士Daytona手表，問佢係邊個送嘅？佢話：「老闆（指楊受成）送嘅，至於點解送畀我，老闆不嬲都錫我哋㗎啦！」
Eason見到記者係咁影隻表，就即刻拉長件衫遮住隻名表，佢話：「財不可以露眼！」問Eason知唔知英皇門口擺多咗兩隻石麒麟，佢就九唔搭八問記者：「係咪玉嚟㗎！係就等我攞去賣，跟住再將啲錢畀番公司，多啲財氣。」Eason跟住一輪嘴係咁講風水，佢話：「英皇應該好似滙豐咁，喺棟大廈中間整個窿，我都學過建築㗎，風水咁先好㗎！」Eason繼續話：「我會慎重同楊生傾吓！我都係『陳百』，不過係一百個百。」至於謝霆鋒單官司，Eason就話：「風水茅山我就知一二，法律嘅嘢就唔好問我啦！」雖然Eason好鬼多嘢講，但同同場出現嘅前緋聞女友楊千嬅就冇偈傾，而大會亦安排佢哋兩個一頭一尾咁出場。
湯寶如早排去咗深圳東方旋風文化藝術中心做表演嘉賓，着咗低胸吊帶衫裙。
湯寶如又話當日發現有個男仔跟蹤自己，於是大會嘅保安就捉咗個男仔嚟問話，原來個男仔係佢fans，想攞簽名同影合照，不過又怕醜唔敢出聲，最後湯寶如梗係滿足對方嘅心願啦！
鄺美雲（Cally）前晚喺紅館出席「星雲大師佛學講座2002」，Cally重做埋國際佛光會理事，問到佢去佛學講座會唔會齋戒，Cally話：「最好係咁，我都戒咗牛肉十幾年，我覺得放生條魚，佢真係會回頭望㗎。我都準備安排菲傭去齋堂學煮齋，咁以後朋友嚟屋企聚會都有得食。𠵱家素食好流行，而且對身體又好。」
Cally又話會參加水陸法會，但未必約圈中人去，因為眾生都係平等嘅，唔係叫明星去就特別叻。
施念慈同楊崢噚日去銅鑼灣出席「PAUL&JOE」化妝品開張典禮。
施念慈噚日話：「其實我每次做make-upmodel都會戒口，但係唔知點解都會生暗瘡。」施念慈下個月陪老公陳鴻業去哈爾濱，參加全運會冰上曲棍球賽，佢話：「老公要去比賽，所以我諗住買件做龍門嘅球衣畀佢，件衫都唔平，要成五位數字。」
另外，楊崢同「PAUL&JOE」個老闆好熟，所以佢噚日都有去開張典禮。佢話元旦會喺紐約過，佢好想睇吓九一一之後，自己第二個家變成點。
朱慧珊喺亞視穩坐「一姐」位置，噚日財爺梁錦松出席喺亞視舉行嘅「財經風雲大事選舉」記者招待會，就係由朱慧珊負責迎接財爺，朱慧珊今次係第二次見財爺，一見面就恭喜財爺做咗人哋老公兼就嚟做老竇，原本朱慧珊重話諗住問財爺佢太太着邊個牌子嘅孕婦裝，不過可惜時間關係問唔到。