昨日QFII正式啟動，接受外資申請，中資股即出現異動，其中以廣東幫股份炒得最熱，粵海投資（270）勁升20.8%，收報0.93元，粵海制革（1058）及廣南（1203）更分別勁升26%及31%。黑客話，QFII係大陸為A股引入外資的政策，對本港國企及紅籌根本有害而無利，至於噚日中資股勁升，其實主要係市場傳有中資流入港股就真。
黑客話，若QFII實行，外資流入A股，則中資在內地的投資便可趁勢減磅套現，流入香港市場，最妙係內地又正放寬國企購滙投資海外市場的限制，據聞外滙管理局上海分局已作出放寬，至於廣東能否受惠，則暫時未知。不過，若上海都可以放寬，無理由唔放寬廣東企業。
據聞，呢一批中資唔單止炒國企及紅籌，亦投資藍籌股，所以恒指噚日上升135點，收報10205。
海爾中建（1169）噚日一度急升10%，市場傳出海爾集團會進一步落實注資，其後又傳出另一主要股東中建電訊（138）配售舊股，但由於市場反應一般，結果海爾中建升幅收窄至3.65%，收0.142元。Cookie話，注資就一定會做，可惜市場氣氛唔就，所以各方面都拖住先，等氣氛好轉再算。
噚日銀行界表示對本港23條立法關注，其中東亞銀行（023）寶哥哥表示，憂慮23條立法會影響資訊自由流通。23條立法事情愈鬧愈大，相信難免會驚動到國際投資者，港股評級可能會因為23條而被降低。阿虎同芬佬朋友傾過，佢話香港現時唯一優點是政制及法治獨立，但呢個優點有慢慢減退趨勢，若香港愈來愈似中國，不如直接投資中國重好，反正所面對嘅政治風險都係一樣。
阿虎