財爺梁錦松從歐洲歸來，噚日又四處公開活動，上晝先喺立法會講香港經濟，下晝就去亞洲電視錄影廠，主持「2002財經風雲大事選舉」開幕禮。
呢個活動係由亞視、新城財經台同《信報》聯合主辦，列舉過去一年二十單財經新聞，畀市民投票。
主辦機構三位負責人首先各自選出自己心目中最重要新聞，新城營運總監宋文禧同《信報》執行總編輯陳景祥比較憂國憂民，分別選財赤七百幾億同通縮持續四年；亞視行政總裁陳永棋一向被視為挺董派，佢投票時亦揀咗港府九招救市，認為係對香港最好嘅消息。
不過唔知陳總裁係唔係好忙，儀式一完，送走財爺之後佢就即刻坐車走人。八方反而有興趣想知佢每日留喺亞視嘅時間有幾多呢？
﹙圖﹚財爺親臨亞視總台，亞視台柱朱慧珊（左）梗要傍住啦。
傳真︰2623-9278
電郵︰