2002年亞洲電信展已於昨日在香港會議展覽中心正式開鑼，在來自全球多達三百個的參展商中，雖則不見手機界幾大巨頭的蹤影，但其他品牌的新機依然有看頭，內置鏡頭機種成全場焦點所在，大熱彩芒機亦唔少得，更由內彩到外，外芒都彩埋。
記者：招佩珊
攝影：陳智良、陳穎
今次是國際電訊聯盟（ITU）成立以來的第25屆電信展，亦是在亞太區舉行的第6屆，展期由昨日起至7號，頭6日供業內人士參觀，7號星期六則開放予公眾人士，入場費每位$20並於即場購買，展覽時間為每日早上10時至下午6時，只准12歲或以上人士入內參觀，有興趣不妨周末到會展看看。
影相手機各顯神通
P408180°旋轉屏幕
唔鍾意摺機因打開後變相將機身拉長，P408強在可將屏幕作180°旋轉，摺機Size不變但有芒睇，可以將芒擰向左Show畀身邊人睇相，唔阻碇夠方便。
V200
三頻雙芒機
同是對摺兼鏡頭可旋轉作多角度拍攝，而機面則有個小芒睇到日期時間、來電顯示等資料，亦支援三頻可漫遊美加等地，公幹旅遊打電話影相一機搞掂晒。
i700
PocketPC打電話
有埋手機功能是近期PDA界的另一個新發展路向，i700呢部PocketPC便是新成員，更內置鏡頭毋須外加配件便可直接影相，可惜行韓國CDMA2000制式，香港用唔着。
N8 內外芒齊齊彩
內置鏡頭當然是賣點之一，但N8唔單止機內有65,536色彩色屏幕，機面個芒亦有4,096色，影完相之後亦可用作來電大頭貼，唔使打開都知邊個打嚟。預計於明年1月上市，估計售價約$4,500-$5,000，是時候儲定錢。
C606
3G機可拍片
機面個3字表明了其3G手機的身份，點止影相咁簡單，機內機外都有鏡頭可作視像會議及視像錄影，亦可下載及播放影音檔案兼發送MMS，發揮其多媒體功能。
SCP-550 國內有得用
行CDMA制式的SCP-550未必於香港用到，新機預算國內推出，機內屏幕有常見的65,536色，機面小芒亦有4,096色，芒仔細細有齊大頭貼及Wallpaper。
G8000 鏡頭可作270°旋轉
鏡頭可影相、拍片及可作270°旋轉，影相時唔使自己行前行後好就手。備有65,000色彩芒及MMS功能的G8000預計於明年第一季登場。
勁擸新機晒Service
連網絡商都湊影相熱潮，喺CSL攤位見到兩部還未上市的影相手機，Nokia6650及3650同樣可影相兼拍片，用新機示範下載影片的新Service當然夠吸引，竟然咁快有得睇，亦即新機好快上市大家有得用。
SAMSUNG內外都要彩
S308 輕巧雙彩芒
總覺已上市的SAMSUNG彩芒好大部，但見到S308就完全改觀，三圍數字只有80×40×23mm，攞把尺度度就知有幾細部，內芒及外芒同是彩色，加上40和弦及MMS功能，的確吸引。
T508女人專機玩鑲鑽
唔係話紅色便是女人機，機面屏幕外框鑲鑽兼睇到諸如玫瑰花的開機畫面，再加上測月經及卡路里功能，女士們必捧。
CDMA家族雙芒變全彩
一提CDMA興趣即時大減，之所以Show呢3部機，是要話畀你知已經玩到內外芒都有彩色，GSM及CDMA都一樣用，必成來年手機的指定功能。
N8000換面板摺機
唔使等到頸都長，N8000預計於今個月內上市，賣點是彩芒兼可換面板，自DB5000後各NECFans終於有新機用，估計售價約$2,500。
MYG-5扮GameBoy
似足GameBoy，為打機而設的功能呼之欲出，據代理講新機上場時，會有更多遊戲可經WAP下載襯番部機，預計聖誕節前上市。