如果不是要拍戲，應該不會如此注意天氣的改變，每朝起身第一件事就係打開窗簾，睇吓街外的地下是乾還是濕。如果不是要拍戲，應該不會如此注意天氣報告，聽完港台發覺唔啱心水，立即扭去聽商台，博吓聽到個啱心水啲嘅天氣報告，我諗我應該係已經黐黐哋線。
連續好幾天，天空一片灰濛濛，據聞是冷空氣遇着熱空氣，於是得閒就灑幾滴雨。連續好幾天，需要拍攝一些室外的場景，所以好擔心天氣會愈變愈壞。五天前便開始每日留心天文台的天氣報告，本來的說法是密雲雨天，然後天氣放晴；翌日則改口說成應該連續多天密雲，間中有驟雨；到了拍攝當天，早上的天氣報告已變成肯定密雲，肯定有驟雨。雖然壞天氣已是鐵一般的事實，但開工的通告早已發出，惟有四個大字——「硬着頭皮」開工去。
幾十人處身於西貢某山谷的盆地上，烏雲蓋頂，一滴風都冇，雨一直下。雨勢是令人懊惱的，既不是猛烈得可以立即下令嗌收工，但又足以阻礙拍攝，拍三分鐘，停半個鐘，十幾人一堆擠在一把太陽傘下避雨，有一搭沒一搭地講着笑話打發時間，苦中作樂。
泥地已變成泥濘。終於，把當天的戲份拍完，大喊一聲：收工，工作人員歡呼回應。回程時想起大家躲在太陽傘下的情景，其實又幾浪漫。如果唔係拍戲，該情景都冇乜可能會發生，拍戲真係幾好玩。