政府救市九招令樓市氣氛轉好，且續見短炒獲利個案，但其實市場都有唔少炒作蝕本例子，沙田第一城就係其中之一。中原地產區域經理陳世民對蘭西講，近期沙田第一城有近二十個炒家盤轉手，大部份都要損手，普遍輸三、五萬！佢話已經算好彩㗎嘞。
原來唔少炒家喺半年前吸納沙田第一城平價貨，諗住略為裝修賣番出去賺番啲，點知個市係咁跌，結果全部變晒蟹貨。好彩政府出手救市，吸引用家入市，炒家至有鬆綁機會，以九十零萬散貨，計落都係蝕少少，執番身彩。𠵱家市場重有約十個炒家盤放緊。
陳世民透露，其實有啲炒家蝕賣手上嘅單位之後，好快又入番啲新貨，主要係吸納七、八十萬嘅銀主單位，等過完年就出貨，若果以市價出到貨都有油水。
聖誕節就快到，好多人都會寄聖誕卡畀親朋好友，但有冇諗過4140萬張聖誕卡，要砍伐幾多棵樹呢？答案係萬八棵。
長江集團中心自99年12月開始，推行循環再造紙計劃，超過七成租戶參與，到上個月為止共收集到百幾萬公斤可供循環再造嘅廢紙，足以製成4140萬張聖誕卡。
而長實又推動「綠色聖誕」，唔再寄聖誕卡，改為喺信紙上印上祝賀句語，合乎環保原則。
講開長實，佢哋嘅馬鞍山海澄軒海景酒店，除咗推出月租計劃外，今日重會公布推出長期套房出租計劃。
香港興業揚言落重本，宣傳東涌新盤藍天海岸，首個大型記者會已扣晒分。
近排天氣咁差，發展商依然如期約記者噚朝十點半喺金鐘等，坐直升機睇東涌嘅規劃同發展，多間報館記者依時抵達，見天色昏暗已心知不妙，等到過晒時都未見發展商或公關出現，打電話問先知個記者會喺十點鐘已決定取消，因為公關冇記者電話所以無法通知，要成班記者冒雨呆等，重畀啲咁嘅解釋，唔通呢啲就係所謂嘅「新思維」？
返到公司見到興業送嘅遮，諗起朝早佢哋嘅安排，都唔知好嬲定好笑。
新地、恒基同陸海通合作嘅屯門愛琴海岸，最近有代理入市買嚟自住，佢就係美聯物業青衣翠怡花園分行經理黎亮文，以127萬購入1座中層H室，面積688方呎，每呎1846蚊。
黎亮文原本住馬鞍山居屋，𠵱家就將單位原價賣番畀房委會，佢話日後返工可以方便啲喎！
太古地產為東涌東薈城安排「東薈城聖誕夢幻旅程」嘅主要節目，將會係老少咸宜嘅魔術同占卜。太古地產重喺澳洲請專人嚟布置場地，將商場露天廣場變成有濃厚古歐洲色彩嘅魔法帳篷同舞台，等大家有奇幻感覺。
表演節目包括教授簡單有趣小魔術嘅「魔法學堂」，同埋講解時下最流行塔羅牌每張牌代表乜嘢嘅「塔羅占卜」。想參加嘅，只要喺東薈城購物滿400蚊，就可以攞到其中一項嘅入場券，限期係本月14至26號。
蘭西
電郵地址：