元朗食神梁文韜唔只係香港揚名，重威到外地，最近法國佬就封佢為「廚中之廚」。
韜哥同八方講，個獎係法國美食會駐遠東區主席古載禮親自嚟香港頒畀佢，呢位古先生當然係美食專家啦，佢其中一個重要任務就係到處搵靚嘢食。古先生早前專程到元朗大榮華試食，食神韜就當住佢面煮咗幾味拿手小菜，食到古兄猛話好嘢。
法國佬一向識飲識食，八方最近去法國，佢哋嘅食譜同習慣同中國人好相似。例如唔只識食鵝肝，重識食鴨腎，佢哋個味鹹鴨髀，同我哋嘅蒸臘鴨髀做法差唔多一樣。
法國佬重好注重飲食定時，一日三餐，早餐可小吃，午餐不可少，晚餐更加要食足三、四粒鐘。八方下午三點鐘走入間餐館，點知休市，只有麥當勞做生意。法國人話美國人冇文化，呢個係其中一個原因。
﹙圖﹚法國美食會駐遠東區主席古載禮（右）專程到元朗大榮華試食，重親自頒獎畀韜哥。
傳真︰2623-9278
電郵︰