名公子林少入獄，令賓架界不勝唏噓，六十幾歲嘅賓架就同佢幾熟，七十幾歲嘅前輩賓架就有幸見過佢嘅尊翁，至於五十幾歲嘅賓架就可能在佳寧時代同公子交過手。無論係邊一代賓架，都對公子林以假文件罪入獄，覺得莫名其妙。
《南華早報》專欄作家JakevanderKamp（十一月二十七日）因公子入獄而想起八一年末與陳松青會面一事，寫得非常抵死過癮。今日有人指責證券分析師為求生意，亂咁寫報告，睇咗vanderKamp嘅古仔，就知道呢啲事「自古已然」。
但vanderKamp有一件事嘅推論，應該係估錯咗。佢話當年金門大廈由陳松青、林公子賣畀美國銀行，改名「美國銀行大廈」（BankofAmericaTower，簡稱BOAT，當時嘅笑話就係「艇」內嘅公司，唔坐艇都幾難），可以估得到這間銀行要孭壞帳，相信佢嘅意思係指美國銀行孭咗鑊。事實就係，美國銀行只用現金買金門大廈，冇借過錢畀佳寧，因此冇呢筆壞帳。當年嘅名義賣家（nominalseller）係Bylamson（百寧順）。拆開睇就係B.Y.LamSon即係林炳炎兒子，又即係林公子，後來知道佳寧與百寧順之間嘅交易，內情複雜，呢度唔寫得咁多。毛孟靜老公PhilipBowring當時係《遠東經濟評論》記者，與同事RobertCotrell八四年出咗一本TheCarrianFile甚有參考價值。