曾經俾全英國人民唾棄嘅「辣媽」VictoriaBeckham，近年專心幫碧咸（DavidBeckham）湊仔，的確少咗出嚟蒲，同以前好唔同！
唔知係咪呢個原因，最近英國就有調查發現，Victoria原來係當地孕婦眼中嘅最受歡迎名人媽咪！我羅拉以為碧咸冧師奶掂啫，估唔到佢老婆喺呢方面都有一手！
喺呢個名為「名人好媽媽」嘅選舉入面，每五個受訪孕婦之中，就有一個話Victoria係佢哋嘅頭號偶像。其他上榜嘅媽咪，重包括靚太嘉芙蓮薛達鍾絲（CatherineZeta-Jones）、英國名模姬蒂摩絲（KateMoss）同埋網球明星漢文（TimHenman）嘅老婆Lucy等。不過佢哋嘅受歡迎程度，真係同Victoria爭幾條街咁遠。
如果你問我羅拉Victoria點解會贏呢個好媽媽選舉，咁就梗係啲英國師奶羨慕Victoria可以嫁到碧咸，兼且生埋兩個咁cutie嘅囝囝啦，而原來全英國有百分之三十五嘅孕婦，都想好似Victoria喺懷孕期間咁，着低胸衫都着得咁有style喎！