日本時裝重點在起勢變，愛扮靚的OL，面對價錢高企的新貨，只能咬牙切齒。其實去年貨色真不如今年好，我又覺得關鍵在於你如何搭配而已，若然有專業人士指點你衣着迷津，開倉貨也可穿得摩登，着得入時。現在有請Venus用Person's開倉日本時裝，替大家度齊一星期六日的上班服，至於價錢方面……睇睇消費者有咩寶貴意見。
記者：楊一凡 攝影：陳陶鈞
ImageGirl：Teddy
能躋身為日本時裝公司的設計師，全因Venus自小已熱愛日本文化，小時候參照卡通片主角，玩時裝DIY；現在Keep住一季一遊咁啦。日本時裝有咩好？Venus回答：「日本衫剪裁好Fit香港人，除此以外，內外都咁講究，隨手反轉頂帽、件衫或者條裙，都可見其細緻的縫合技術，甚至令你誤會可反轉着，再誇些少係連皮鞋內櫳都有得意圖案，這亦解釋了點解日本時裝，下下幾百蚊件。」
(黑色樽領+棗紅V領+卡其百褶裙)
VenusComment：黑色貼身樽領百搭百襯，同場還有棗紅及湖水藍色；桃紅V領長袖重在領位喱士，讓你看上加倍俏麗；卡其布百褶裙，感覺年輕跳脫，返工去街都易襯。
黑色樽領
原價：$250 開倉價：$60
棗紅V領
原價：$390 開倉價：$117
卡其百褶裙
原價：$360 開倉價：$144
裝身價：$321
(黑色樽領+格仔背心裙)
把背心格仔裙套在黑色樽領衫上，又係一個斯文上班Look，而且全套價錢只要$160。若有黑色或啡色長靴，不妨用來襯連身裙，視覺上身形會較修長。
格仔背心裙
原價：$590 開倉價：$100
行政人員Amy估價：
條裙都幾靚，棗紅長袖的喱士花車得幾好，如果套衫賣三百蚊鬆啲我都可接受。
(黑色中袖+長圍巾+曲腳裙)
VenusComment：其實上衫和裙，都係Basic款，可選顏色還有棗紅及黑色；我們在衫身的方領位及裙上加喱士，一方面突顯女性柔美，其次是食番喱士潮流；灰啡白混色Scarf織針有疏有密，可點綴沉實的淨色衫裙。
黑色中袖
原價：$360 開倉價：$108
長圍巾
原價：$290 開倉價：$50
曲腳裙
原價：$390 開倉價：$117
裝身價：$275
(恤衫+針織外套+曲腳裙)
上班服離不開恤衫西褲，不過恤衫可在鈕釦位及領口玩嘢。領位以車線代替反領，胸前有直線褶紋，帶歐陸Feel；外披的針織衫，可說是四季合用。下身配番曲腳裙。
恤衫
原價：$320 開倉價：$128
針織外套
原價：$290 開倉價：$58
常陪女友買衫的林先生估價：
我女友都有買開呢個牌子，薄薄哋一件都要幾百蚊，呢套衫減咗價都要三百啦。
(毛領外套+米色絨褲)
VenusComment：若果穿毛毛外套時，只扣頸位鈕，企領穿法，睇落去幾型幾Cool；若然把毛毛領反出來，比較細路女；米色絨褲低腰直腳設計，另有黑及深藍色，款式長青又穩重，每個OL點都會預幾條過冬。
毛領外套
原價：$590 開倉價：$200
米色絨褲
原價：$520 開倉價：$104
裝身價：$304
(大領冷衫+低V背心+米色絨褲)
雖說周末是便服日，但又想保留番些少女性矜持，不如拋棄喱士毛毛，穿上暖不透風的冷衫，外披低V絨布背心，同樣襯番絨褲，遠看活力十足。
大領冷衫
原價：$360 開倉價：$68
低V背心
原價：$320 開倉價：$128
日本迷Coco估價：
件毛毛衫幾得意幾Cute喎，雖然薄身咗啲，但睇個款至少要四百蚊，條褲就老積啲，唔多啱我，全套要五百蚊啩。
漁夫賊仔帽
今年時興的賊仔帽質料軟熟，就連模特兒Teddy也一戴鍾情，另有深啡色供你選擇；漁夫帽內櫳是格仔布，只要把嘜頭剪下，可反轉戴，另有黑色及棗紅色。
絨毛手挽袋
織針較燈芯絨密的天鵝絨，摸上手輕軟溫柔，袋口以流蘇點綴，加重時代感，配絨褸着返工亦可，襯卡其褸及牛仔褲，當Casualwear又得。
冷衫連圍巾
淨色冷衫可說是指定的辦公室服裝，一件在身，襯條絨褲外披大褸，穩陣夠大體。方便任何膚色的OL，淺啡、深灰、粉紅及粉藍等多色長短冷衫連頸巾，方便不同膚色的OL，配任何顏色的褸。
查詢電話：26267066
地點：長沙灣道777至779號天安工業大廈B座7樓(荔枝角地鐵站A出口)
開倉日期及時間：12月5,6,9,10及11日，上午11時至晚上7時；12月7日上午11時至下午3時半。
付款方法：購物滿$400可用Master及Visa。
備註：以上開倉衫、褲、帽，每款存貨約100件。