皇家蘇斯達同埋馬略卡不愧為今屆西甲奇兵，喺禮拜日一隊主場砌低巴塞；一隊作客踢少個都攻到拉科氣咳，有捱眼瞓睇嗰場波嘅人都一定會豎起手指公讚好嘢。話時話，兩隊共通點都係有件威猛借將，無得頂。
今季西甲借將真係醒，高華斯域俾拉素借番去皇蘇之後成個天王咁。另外，借將倒戈重勁，由拉科借去馬略卡嘅彭迪安尼，禮拜日幫到隊波踢到識飛咁。皇馬借去桑坦德嘅梅里迪斯，之前倒戈亦有波入。
好多人爭論過，借將對番自己所屬球會唔應該落場，甚至有人話應該學英超咁，禁止同級球隊嘅球員借嚟借去，費事尷尬。不過，我求大俠覺得如果咁做，好多響大球會無正選踢嘅高質球員就會不見天日，亦難有奇兵出現，從觀賞角度睇無疑係一大損失噃。
話說啱啱過去嗰個禮拜日（十二月一日）係世界愛滋病日，球壇人士都紛紛企出嚟宣傳防治工作，同埋反對歧視。當日意甲就有球員着晒支持口號嘅衫亮相，唔知外國通訊社係咪玩嘢，咁多隊唔影，淨係要將焦點擺響米蘭雙雄嘅球員身上。就算緋聞同志韋利同埋恩沙基真係有嘢，唔代表人哋有病啫，真搞嘢。
意大利傳媒間唔中就會傳吓關於羅馬前鋒卡斯辛奴嘅負面新聞，例如早排就話佢同教練罵戰，同埋擅自離隊。聽講呢位足球小將受過教訓後已經精乖同埋謙虛咗。睇佢禮拜日對祖雲達斯入波後，無好似以往咁趾高氣揚，而係手指指對住傳個靚波畀佢嘅托迪，表示托迪功勞更大，真係孺子可教也！
曼聯前鋒科倫前日對利記省入兩粒，威到盡，不過衰在佢慶祝入球時唔夠瀟灑，作勢剝衫慶祝，遲疑之後又無做，真係笑爆嘴。大家都應該估到科倫嗰一刻諗咩，佢一定係諗番起上個月對修咸頓入波後除衫慶祝，點知唔識着番件衫個狼狽樣，所以唔敢再試。響比賽睇到球員真情流露，真係一大快事。
AC米蘭方面言之鑿鑿咁話，養傷養到發晒霉嘅列當度，好有機會響今日意國盃對安科納落場，當畀機會佢熱身。我求大俠提醒佢，意大利盃對AC米蘭係就係盃仔，但乙組隊就視為重要錦標，唔搏就有鬼。記得朗拿度同埋巴治奧以往都試過響呢個盃賽中受傷，小心呀！列當度。