曼聯嘅碧咸認真新聞多多，最新鮮熱辣嘅一宗，就當然係有人喺網上指佢搭上咗奧雲個妹嘅好朋友萊絲莉呢單嘢，搞到要碧咸發表聲明否認之餘，重話任何傳媒轉載呢單流料嘅話，就會採取法律行動㖭！
至於碧咸個老竇泰迪就喺接受星期日英國報章訪問時，話個仔同埋新抱辣妹，畀一宗接一宗嘅不利新聞搞到好困擾，碧咸更諗過自殺，世伯重話碧咸夫婦寧願放棄晒一切名利，以換取寧靜咁話喎。
聽到世伯咁講，我求大俠就覺得凡事有因必有果，如果當日唔係碧咸夫婦咁高調，今日未必會有咁多負面新聞，再者，佢哋咁鍾意出風頭，要「歸隱田園」得唔得先，「食得鹹魚抵得渴」，兩夫婦睇化啲啦！
我求大俠雖然唔係布力般嘅番士，但就好欣賞佢哋嘅美國龍門費度，佢做完膝頭手術短短十二日即刻復出，重喺上個星期六對富咸嘅英超聯表現神勇，救出馬列嘅十二碼，令球隊取得近五場聯賽以來首場勝仗。雖然有句說話叫「冇話冇咗邊個唔得」，但我求大俠相信布力般如果冇咗費度就真係唔係好掂。
講開龍門，唔知大家重記唔記得前車路士嘅俄羅斯龍門卡連呢？其實卡連把關技術唔錯，反應又快，不過就衰在有啲神神化化，搞到𠵱家只係三十四歲，就淪落到打英格蘭非聯賽球隊霍恩卓奇，重喺前日首次同霍恩卓奇披甲對伯克漢姆斯達城中，用頭撞對手被逐，認真冇佢收。
凱沙羅頓嘅德國國腳前鋒高路斯喺世界盃時經常有入波，相信帶挈咗唔少鍾意賭波嘅球迷，不過世界盃之後佢就一日黑過一日，喺德甲聯入波甚少；早前重「擺烏龍」，而喺前日對禾夫斯堡嘅聯賽，球隊雖然贏波，但佢就勇戰受傷，左膝韌帶撕裂，要唞幾個月，睇嚟佢真係要搵啲碌柚葉沖涼至得喇！
NBA嘅爵士球星馬龍噚日出戰馬刺只要多攞七分，就可以達到自己職業生涯累積分數三萬五千分嘅新里程。哈！點知咁啱呢位老將喺場波就剩係攞咗七分，打成咁，爵士就梗係輸波啦，難怪馬龍賽後對呢個里程碑都冇乜反應，由呢樣嘢睇我求大俠就知馬龍係將球隊放喺首位嘅人，好值得其他年輕球手學習。