𠵱家樂壇新人輩出，想要突圍而出，真係一啲都唔容易。一個新人除咗形象同包裝重要之外，曝光率同新歌播放率亦都好重要，所以唱片公司方面往往會幫新人爭取上電台同電視台宣傳，或者安排佢哋出席各類型大大細細嘅公開活動，實行有殺錯冇放過。
之但係，以上嘅做法對催谷𠵱家嘅新人未必足夠，馮仁昭聽聞MusicIcon最近為咗幫佢哋嘅新人趙頌茹宣傳新歌，於是搵咗一班貨車司機幫手，以每小時一百五十蚊嘅酬勞，叫班司機喺鬧市不停播趙頌茹啲新歌，通常貨車司機好鍾意開大聲啲部CD機播歌，喺鬧市咁播歌法，想唔唱到街知巷聞都唔得啦！諗落呢條橋真係幾絕㗎！計馮仁昭話，橫掂的士生意咁淡，不妨搵埋的士司機播歌，真係分分鐘好過載客㗎！
陳文媛（BoBo）噚日去尖沙嘴出席一個器官捐贈活動，重喺現場玩模型車比賽，BoBo成績都唔錯，佢話：「我未入行就有車牌，雖然我少自己揸，不過好彩冇俾狗仔隊跟過。」問BoBo佢架係乜嘢車，佢就死都唔肯講，梗係啦，到時俾人跟到同佢男友食飯就慘啦！
冇見一排嘅姚正菁，噚日出現尖沙嘴一個公開活動，原來佢五歲嘅囡囡有份演出，做媽咪嘅梗係要捧場啦！但因為佢個女好怕醜，之前又俾記者影咗一輪相嚇親，所以到佢個女上台時就唔肯上，就算老竇走埋去畀糖佢食都唔制，小朋友真係唔嚇得。
有位港姐出身嘅無綫姐仔，雖然同佢男友拍咗拖唔係太耐，但男方個爸爸已經當正姐仔係佢新抱。早排有傳姐仔出年結婚，雖然事後姐仔同傳媒否認，但有人同馮仁昭講，想結婚嗰個其實係姐仔男友，不過，姐仔男友冇乜錢，所以四處搵人贊助婚紗同酒席，等到一切搞掂之後先同姐仔求婚咁話。
任達華噚日喺鑽石山出席有線嘅禁毒活動，佢話自己一定唔會試毒品，寧願飲多幾杯火麻仁清熱。任達華對於近日有多個圈中人都醉酒駕駛，佢暗寸呢啲藝人，任達華話：「呢啲係佢哋嘅宣傳方法，我唔會理佢哋，每個人嘅態度都唔同，我覺得醉酒冇問題，但千祈唔好醉酒駕駛，咁樣會危害社會。」
有中國木村拓哉之稱的鋼琴家李雲迪，噚日去咗銅鑼灣出席「保良局開放日」，李雲迪捐出簽名CD同海報義賣。現場睇佢簽名都簽到手軟，不停問身邊助手簽夠未。當李雲迪睇何韻詩表演時，佢有啲心不在焉，唔知係咪因為行程太緊密，有啲攰呢？