八方日前索到一宗豪門趣聞，故事由「假牙」開始。上年十月，丟空四年嘅世界級豪宅創世紀，以銀主盤招標求售，賣家一度打開大門畀記者拍攝呢間價值五億元山頂玻璃屋嘅風光。
呢座由股壇怪傑香植球興建嘅創世紀，裝潢華麗，擺設奢華，大廳地板上有兩幅老虎皮，飯廳通道兩邊放咗一對巨型象牙，鋼琴下面就墊住張斑馬皮，成個原始森林咁。
象牙、虎皮同斑馬皮都係世間珍品，當《壹週刊》圖文並茂嘅報道面世之後，平民百姓睇到固然歎為觀止，坐喺長沙灣政府合署嘅一隊漁農自然護理署「瀕危物種保護科」人員，更加睇到眼都凸埋。呢幾樣「珍品」取自瀕危動物軀殼同器官，老早已經禁止出入口，漁護署人員睇完本雜誌之後，由驚歎變成疑惑，再由疑惑變成關注，終於決定採取行動，入屋調查。
當故事發展到最扣人心弦嘅時候，竟然出現反高潮，調查人員一輪鑑證之後，唔知笑好定喊好，原來嗰兩隻黃裏透白嘅象牙係流嘅！
至於嗰幾塊獸皮，八方之友冇交代，但係既然調查人員無功而還，睇怕都係……
（圖）創世紀飯廳通道兩邊放咗一對巨型象牙，不過係流嘅！ 《壹週刊》圖片
傳真︰2623-9278
電郵︰