2002年快將完結，展望2003年仍有多款新車推出，當然唔少得奧迪車廠一份兒，因為佢哋響2003年中，會為旗下嘅TT推出3.2Quattro型號，而且重會配用全新DSG波箱，從而令性能表現變得更突出。
從外表而言，全新TT3.2Quattro與原有其他TT型號相近，但經改良嘅頭尾整流器等配搭，全都將其高性能跑車形象表露無遺；車廂配搭亦有類似修改，其中設於軚盤上嘅轉檔推桿會改為鋁合金製成品外，表板嘅最高車速刻度更高達280km/h㖭！不過，最矚目會係新車一台3.2公升V6引擎，馬力及扭力輸出分別為250ps及32.7kgm外，配合一套全新DSG(DirectShiftGearbox）6前速波箱，除糅合咗操控手波車嘅樂趣及自動波車嘅方便之餘，重可以讓引擎發揮得淋漓盡致㖭！有興趣嘅車迷，就要密切留意新車在港嘅推出日期喇！