日本女歌手椎名林檎令我大口羅拉敬佩嘅地方，除咗係佢嘅音樂夠堅外，就係佢喺形象同其他嘅創作上面都好有諗頭。最近我大口羅拉上過林檎嘅個人官方網頁，發現佢已經將個網頁大翻新，喺個網內開咗好鬼頂癮嘅戲院。
上次椎名林檎因為宣傳自己嘅翻唱金曲大碟《歌手的幸福其之一》，就將自己個網頁整成一間卡啦OK咁。林檎下年年頭出第三張大碟，之前就會出一個短篇電影DVD《百色眼鏡》，所以佢今次就將自己網頁整成一間戲院。
我大口羅拉覺得林檎新碟個名叫《加爾基精液栗之花》真係好激，激到慣嘅佢亦好抵死咁將間戲院叫做「NickelOdeon性銀映」，整到好似色情影院咁。
戲院嘅大堂都幾搞嘢，除咗可以見到林檎嘅和服新look之外，櫃台上面嘅糖果可以任攞。左邊部汽水機雖然貼住「壞咗」，但㩒吓最低個掣，竟然有啲「林檎」（即是蘋果）汽水跌出嚟。再入去放映室，重可以睇到林檎嘅新碟同電影嘅資料㖭！
椎名林檎官方網址