公關大姐大聽完去完周莊遊覽朋友嘅訴苦，自己都肉緊埋，於是趕唔切咁講畀左丁山聽。左丁山聽完，突然諗起以前披圖梁講過一個污染茶葉的故事。披圖以自然療法為人治療，發覺一位朋友體內重金屬特多，追查到底，乃因多飲上海杭州名茶之過。後來披圖搵到一張內地報紙，內有報道內地沿海茶葉，因土壤已經受到污染，茶葉亦唔掂，上海衞生局抽查市面出售茶葉，含金屬比例甚高。
大姐大聽到茶葉都可能受污染，為之花容失色。定神之後，再講多一個笑話。佢嘅朋友在周莊上食肆，夥計話：「今日啲魚湯好靚。」朋友問：「價錢如何？」答：「三十八蚊人民幣。」朋友諗住價錢唔算貴，於是叫咗一鍋，又幾好飲喎，味道十足。埋單時候，睇吓張單，咦，多咗三十八蚊嘅？」於是問夥計點計數，夥計話：「魚湯七十六蚊吖嘛。」朋友反駁：「你明明話三十八蚊㗎？」夥計答：「其實係三十八蚊一條魚，你飲嗰鍋湯，我哋放咗兩條魚，咪七十六蚊囉。」哦，語言誤會啫，鬼叫你唔事先談判清楚，朋友無可奈何地找數，又上咗一課。
大姐大咁鍾意去上海品嘗美食，事實上上海啲著名餐廳的確冇得彈，最麻煩就係要企喺門口排隊，譬如虹橋區嘅上海鼎泰豐，賓架L就讚不絕口，認為係靚過台北老店，值得推薦咁話。至於周莊咯喎，大姐大話暫時唔去住咯。