Loretta，靚女OL，一身行政制服，舉止斯文，談吐優雅；換上戰衣，變身電單車手，好勇鬥狠，見彎片彎，見車過車，雖然第一次出賽便炒車，但終極夢想還是參加澳門格蘭披治電單車賽：「我知刻下連排位賽都無可能Qualified到，但我會繼續參加多啲比賽，同班男仔片過……夢想嘛，咁易成功就唔叫夢想啦！」
記者：陳漢榮 攝影：陳穎 部份相片由被訪者提供
逢星期一刊出
自從18歲拿了電單車牌後，Loretta一有空就飆車，結識到一大班車友：「深（水灣）、淺（水灣）、赤（柱）、石（澳）、清（水灣）、西貢加大帽山，我哋一得閒就飛車，愈玩我嘅技術愈好，技術愈好就玩得愈High、揸得愈快。」那時的Loretta很響朵，因為全港駕Fairing車（俗稱大包圍）的女孩子不足10個：「喺個圈裏面咁少女仔，物以罕為貴啩，我都算幾多人追㗎，就前排之嘛，有個細我9年嘅男仔用ICQ同我示愛，我拒絕咗佢。」
7年前邂逅的第二任男友是個車手，二人嗜好一樣，戀情份外投入，他慫恿Loretta賽車：「一來有男友支持，二來自己都心郁郁想試。」報名參加「香蜜湖電單車賽」，初試啼聲即炒車：「愈揸愈快，轉彎玩『飛跪』（急速入彎，車身擺動至膝頭貼地），飛得太低，一失平衡架車就炒，我凌空打咗三個觔斗跌落地，尾龍骨裂咗。我？女仔嘛！梗喊啦，重要嗌晒救命喊到唔識收聲嗰隻。」
「我愛速度，好享受速度帶畀我嘅快感。」Loretta說得很玄：「細細個，我日日睇住爸爸揸電單車返工放工，覺得佢好型、好英。」中學，夠秤入電子遊戲機中心，她最愛玩賽車機；17歲，情竇初開，拍拖，初戀對象也選個電單車手：「第一次坐電單車尾，又驚又興奮，佢架Fairing大車（賽車型電單車），無嘢揸手，只可以攬住油缸，架車一路行一路震，我個心就猛咁震，驚自己跌落車，但又覺得好浪漫喎，全程車河，我塊面無離開過佢背脊，貼到實一實，幻想自己係《天若有情》裏面嘅吳倩蓮，着住婚紗坐華D車尾。」
那年代，其實很少女孩子學電單車：「當時好多親朋戚友都睇死我考唔到牌，但我個人就係咁，好勝、要威、要面子，人哋愈認為我做唔到嘅嘢，我愈去做。」結果，她一擊即中，取牌日，美其名找人慶祝，實際找人做人肉試驗品：「想試自己手車掂唔掂，最直接嘅方法係兜人一轉。」試驗品是她的女波士，她問朋友借了部Fairing車，一程直入赤柱，幸好沒出岔子：「全程我係咁擰轉頭問波士驚唔驚，佢話唔驚，重讚我手車好定，查實我自己就好驚，好驚連累到人。載人，好大壓力。」
一星期後，Loretta買了部二手HondaPGMI：「使咗我$17,000蚊，但第一次擁有屬於自己嘅戰車，興奮到幾晚瞓唔着。」有女性朋友自薦做人肉實驗品，Loretta開心不已，遊車河，行程擬定先到山頂司徒拔道走一轉，再落西環吃糖水，誰知中途有變：「喺山頂遇到8個車友，問我有無興趣一齊遊車河，嗰時聽乜都覺得有挑戰意味，係咪問我夠唔夠膽呀？」難得女性朋友肯赴湯蹈火，全力支持：「入淺水灣，條路唔熟，無意識到前面有個S彎，收唔切油，撞山，炒車！」猶幸車速不算快，二人只擦傷手臂、腳踭：「嗰日着T恤牛仔褲，淨係皮外傷算好彩，個Friend無怪我，更加好彩。」
受創，住院，出院不足一星期，Loretta又到馬來西亞出賽：「老早報咗名，無理由放棄㗎！戴住腰封都要賽車，嗰時就係咁，唔識死！」賽畢，她心情低落了好一陣子，一方面，抵不住父母的「絕世煩音」：「佢哋日哦夜哦，叫我唔好再揸電單車。」另一方面，她的心愛戰車被人偷了：「咪放棄囉！差不多5年，我都無再揸過電單車！」兩年前，她搬屋，為出入方便，買了架綿羊仔代步，某次遊車河，朋友的Fairing車馬力大，她的綿羊仔怎也追不上，她又怒了：「好瘀囉！好無癮囉！明明我手車唔差得過佢哋，但最慢嗰個一定係我。」把心一橫，花$78,000買了部全新戰車，今年還「復出」參加「珠海摩托車錦標賽」，跑尾八：「成績算好好喇，起碼重有7個男仔跟我尾，我𠵱家諗住出賽多幾次，夠料就報『澳門格蘭披治』，呢個係我夢想。」
「有時，我覺得同男朋友嘅角色調轉咗！」Loretta現時的男友小她4年，沒車牌，試過坐Loretta車尾，狀甚尷尬：「你諗吓個畫面，一對情侶走埋架電單車度，由個女仔撻匙、拋個頭盔畀男朋友，上車，先發覺原來女前男後，揸車嗰個原來係女仔，情況幾咁搞笑？」搞笑還搞笑，男友對於Loretta經常賽車，非常不滿：「佢不嬲都反對我鍊車，但佢亦知我唔會改變主意，試過喇，瞞住佢買架新車，吵咗鑊甘嘅！可能佢年紀細過我啦！同佢一齊，總有想照顧佢嘅感覺，鍊車係我嘅興趣，希望唔會影響我哋嘅感情啦！」
姓名：徐樂思（27歲）
職業：船務簽證部副經理
座駕型號：SuzukiGSXR600（$78,000）
飆車年資：9年
95年7月參加「香蜜湖電單車賽」（級別80cc與125cc）；8月起參加「馬來西亞電單車賽」（級別125cc）；02年7月「珠海摩托車錦標賽」（級別250cc與400cc），現為「百老滙電單車會」、「HongKongSuperbikeClub」及「機車樂園」會員，兼任「鐵騎網誌」（