上個周末及周日，福特代理聯同各大商戶，舉行一連兩日特選客戶嘅Fiesta優先預展同試車日，我哋對於呢部城中焦點嘅新一代CityCar自然不敢怠慢，即時為大家作第一手介紹；以一台1.4公升Duratec偈，匹配嶄新DurashiftEST波箱嘅Fiesta有幾正？大家不如一齊嚟睇吓！
特約記者、攝影：李勤
筆者趁住上星期六嘅上午九點鐘，未有咁多客人到陳列室睇預展時，放低記者身份以特選客戶去睇呢部Fiesta，第一眼就覺得部車輪廓鮮明，除好有新一代CityCar嘅色彩外，兩盞一體式大燈，響電鍍鬼面罩及原廠霧燈嘅配襯下，既突出又吸引，四輪頂級15吋跑車合金胎軨同直立式尾燈編排，重烘托出多一份活力呢！
睇車之餘，難得重有試車機會，較意外係傍住筆者試車嘅，係現任福特香港掌舵人LeonardCheng。雖然試車路段只圍繞灣仔區嘅數分鐘路程，但沿路上Leonard介紹咗唔少呢套DurashiftEST波箱嘅特性同好處，發覺響手波同自動波模式下嘅Fiesta，表現順滑自然，重帶出有一份駕駛樂趣㖭！而一套軟滑貼服嘅座椅，加上闊落嘅車廂空間感，重令人留有深刻印象呢！
身為福特香港掌舵人嘅LeonardCheng，認為呢套全新DurashiftEST波箱，糅合咗自動波嘅簡易操控，又具備有手波車嘅好玩一面，完全照顧到不同駕駛者嘅需要及駕駛習慣，加上兩套模式同屬5前速組合，既迎合多彎路斜嘅香港路面環境，兼且重有低耗油量嘅特性，而斜路起步重唔怕溜後㖭！
新車售價：$109,800（標準版）$118,800（真皮版）
車輛提供：福特香港（25031032）