大教授張五常噚日牛一，喺屋企開Party，八方要返工去唔到，於是打電話去道賀，教授喺電話中哈哈笑，話自己年紀大，要收斂的喎。六十七歲點算年紀大？況且教授素來狂傲，若然收斂，就係讀者損失；不過八方問到佢點解個新專欄叫做《還斂集》，教授講吓笑啫。
辛棄疾《過南劍雙溪樓》中有「過危樓，欲飛還斂」之句，教授之「還斂」即典出於此。新專欄聽日起喺《蘋果》刊出，排喺董橋社長《小風景》嘅位置，日後社長寫一三五，教授寫二四六。
大教授又話，寫呢個專欄好有壓力，原因有三。第一，每周搵三個靈感不容易；第二，寫一篇值得人家花時間去讀嘅文章也不容易；第三，同董社長排埋一齊，就更加大壓力。問教授會寫乜嘢內容？佢話經濟、感受、隨筆乜都寫，第一篇即以感慨起筆。
傳真︰2623-9278
電郵︰