拍賣場競投物業，好多時都會遇到業主或銀主以未到價為理由，收番件貨，搞到啲買家好無癮。𠵱家就唔使怕會有咁嘅情況出現，環亞拍賣行喺明日舉行嘅銀主拍賣會，以「一口價」做招徠，即係話若開價後只得一個買家承價，都會出售。不過，若有人出手爭，最後仍會以價高者得為原則定奪。
環亞拍賣行曾傑俊透露，今次同幾間銀行傾咗個幾月，佢哋至接受呢個拍賣方式，而銀行重有就部份單位重駁電力同髹油，等睇樓人士感覺好啲。聽講呢批物業好多都係放咗成年都賣唔出，所以不惜劈價去貨。
另外，拍賣前有免費律師諮詢同睇契服務，到場人士又有獎抽，獎品係八張四人自助晚餐券。
單幢樓一向都難賣啲，發展商畀代理做獨家，都係希望佢哋可以快手賣晒啲單位。好似大豐有限公司嘅粉嶺嘉兆軒，搵美聯做獨家，一個月沽清，所以特別設宴請美記高層食番餐。
地點係九龍塘嘅九龍塘會，除咗食之外，大豐好豪爽請飲加拿大冰酒，好似話每支要成千蚊，成晚嘅消費達五位數字。
不過相對個盤嘅價值，呢條數都係小意思啫。
香港發展商宣傳樓盤，其中一個渠道係喺電視賣廣告，原來內地發展商都興呢一套。聽內地發展商講，電視廣告主要係屬於插播性質，即係喺啲香港節目賣廣告時段插播內地嘅廣告。聽講話深圳電視台一個廣告收費由三千幾蚊到十幾萬，若果要平啲可以考慮喺中山嘅電視台播放，只係收千零蚊，當然效力就一定會打折扣啦！
政府出招救市後，個市都唔算好熱鬧，但地產代理就乘機游說啲業主放盤。蘭西最近聽到單真人真事，有業主喺一個月前，以政府嘅估價八十萬，賣咗馬鞍山居屋單位，點知最近收到某地產代理行嘅來信，話佢個單位𠵱家值九十七萬，重話「市道好咗，樓價升咗，係放盤嘅好時機喎」！
個單位唔夠兩個月竟然升值十七萬，究竟真係咁好世界，抑或係間代理行過份樂觀呢？
新地同信德嘅長沙灣昇悅居，搵中原地產做獨家，中記就出咗個全版廣告，話推出30個精選單位，重揚言「由您出價」，即係唔會有價單，掉番轉頭由買家講出心目中想買嘅價錢，然後由發展商決定賣唔賣，條橋都算幾有創意。
聽講有買家睇完個廣告後去斟，出價都唔算離譜。賣出單位嘅價錢比之前平咗啲。
發展商北望神州，好多相關行業都跟住北上，承建商係其中之一，承接唔少公營工程嘅新昌營造，啱啱喺內地承接咗單工程，重唔係細嘢㖭。
新昌營造董事總經理張少麟話，項工程係幫華為技術有限公司，喺深圳龍崗區興建名「華為總部」嘅綜合項目，包括寫字樓、會議中心同餐廳，總樓面超過一百萬呎。
合約總值六億二人民幣，比香港嚟講都係大嘢，但施工期就只有五百日，即係唔夠年半，都幾趕㗎。
新昌集團喺1939年成立，到𠵱家已經有六十三年，除咗起樓之外，重有做機電安裝、修葺、裝修、物業管理同保險等業務。
蘭西
電郵地址：